ലങ്കയ്ക്ക് ജയം:
പരമ്പരയില്‍ ഒപ്പത്തിനൊപ്പം
കൊളംബോ: ആസ്‌ത്രേലിയക്കെതിരായ ഏകദിന പരമ്പരയിലെ രണ്ടാം മത്സരത്തില്‍ ശ്രീലങ്കയ്ക്ക് 82 റണ്‍സിന്റെ തകര്‍പ്പന്‍ ജയം. ശ്രീലങ്ക ഉയര്‍ത്തിയ 289 റണ്‍സ് വിജയലക്ഷ്യം പിന്തുടര്‍ന്ന ആസ്‌ത്രേലിയ 206 റണ്‍സിന് പുറത്താവുകയായിരുന്നു. ജയത്തോടെ അഞ്ചു മത്സരങ്ങളുടെ പരമ്പര 1-1ന് ഒപ്പമെത്താനും ലങ്കയ്ക്ക് സാധിച്ചു.
ലങ്കയുടെ മികച്ച സ്‌കോര്‍ പിന്തുടര്‍ന്ന കങ്കാരുക്കള്‍ക്ക് 41 റണ്‍സിനിടെ മൂന്നു താരങ്ങളെ നഷ്ടമായി. ഡേവിഡ് വാര്‍ണര്‍(1) ആരോണ്‍ ഫിഞ്ച്(4) സ്റ്റീവന്‍ സ്മിത്ത്(30) എന്നിവരാണ് പുറത്തായത്. ജോര്‍ജ് ബെയ്‌ലി(27) മാത്യു വെയ്ഡ്(76) എന്നിവര്‍ പൊരുതിയെങ്കിലും അധികം മുന്നോട്ടു പോവാനായില്ല.
ബെയ്‌ലിയെ പുറത്താക്കി അപ്പോണ്‍സോ ഈ കൂട്ടുകെട്ട് പൊളിച്ചു. തൊട്ടുപിന്നാലെ മോയ്‌സസ് ഹെന്റിക്‌സും(4) പുറത്തായതോടെ കങ്കാരുക്കള്‍ അഞ്ചിന് 118 എന്ന നിലയിലേക്ക് വീണു. പിന്നീട് ട്രാവിസ് ഹെഡ്(31) മാത്യു വെയ്ഡ് സഖ്യം 64 റണ്‍സ് കൂട്ടിച്ചേര്‍ത്തു ടീമിനെ മുന്നോട്ടു നയിച്ചെങ്കിലും തോല്‍വി ഒഴിവാക്കാനായില്ല. ജെയിംസ് ഫോക്‌നര്‍(13) മിച്ചല്‍ സ്റ്റാര്‍ക്(0) ആദം സാംപ(5) എന്നിവര്‍ പെട്ടെന്ന് കൂടാരം കയറി. നാലു വിക്കറ്റ് വീഴ്ത്തിയ അമില അപോണ്‍സോയാണ് ലങ്കന്‍ ബൗളര്‍മാരില്‍ തിളങ്ങിയത്. തിസാര പെരേര മൂന്നും എയ്ഞ്ചലോ മാത്യൂസ് രണ്ടും വിക്കറ്റെടുത്തു.
നേരത്തെ ടോസ് നേടിയ ലങ്ക ബാറ്റിങ് തെരഞ്ഞെടുക്കുകയായിരുന്നു. തുടക്കത്തില്‍ തന്നെ ഓപണര്‍മാരായ ധനുഷ്‌ക ഗുണതിലക(2) തിലകരത്‌ന ദില്‍ഷന്‍(10) എന്നിവര്‍ പുറത്തായെങ്കിലും കുശാല്‍ മെന്‍ഡിസ്(69) ദിനേഷ് ചാണ്ഡിമല്‍(48) എയ്ഞ്ചലോ മാത്യൂസ്(57) കുശാല്‍ പെരേര(54) എന്നിവരുടെ മികവിലാണ് ലങ്ക മികച്ച സ്‌കോര്‍ സ്വന്തമാക്കിയത്. ആസ്‌ത്രേലിയക്കായി മിച്ചല്‍ സ്റ്റാര്‍ക്, ജെയിംസ് ഫോക്‌നര്‍, ആദം സാംപ എന്നിവര്‍ മൂന്നു വിക്കറ്റെടുത്തു.