കോഴിക്കോട്: ടോക്കിയോ ഒളിംപിക്‌സില്‍ മെഡല്‍ നേടിയ താരങ്ങള്‍ക്ക് വിവിധ സംസ്ഥാന സര്‍ക്കാറുകള്‍ വലിയ പാരിതോഷികങ്ങള്‍ പ്രഖ്യാപിച്ചുകൊണ്ടിരിക്കുകയാണ്. എന്നാല്‍ ഹോക്കിയില്‍ വെങ്കല മെഡല്‍ നേടിയ മലയാളി താരം പി.ആര്‍ ശ്രീജേഷിനെ പരിഗണിക്കാതെ സംസ്ഥാന സര്‍ക്കാര്‍. മെഡല്‍ നേടിയ അന്നുമുതല്‍ വിവിധ സംസ്ഥാനങ്ങളില്‍ നിന്നുള്ള താരങ്ങള്‍ക്ക് അവരവരുടെ സര്‍ക്കാറുകള്‍ ഒരു കോടി രൂപ മുതലുള്ള പാരിതോഷികങ്ങള്‍ പ്രഖ്യാപിച്ചിരുന്നു. ഒളിംപിക്‌സ് കഴിഞ്ഞിട്ടും സംസ്ഥാന സര്‍ക്കാര്‍ ശ്രീജേഷിന് പാരിതോഷികമൊന്നും പ്രഖ്യാപിച്ചിട്ടില്ല. സംസ്ഥാന ഹോക്കി ഫെഡറേഷന്‍ പ്രഖ്യാപിച്ച അഞ്ചു ലക്ഷം മാത്രമാണ് സര്‍ക്കാറിന്റെ ഭാഗത്തുനിന്നുള്ള പ്രഖ്യാപമുണ്ടായിരിക്കുന്നത്. ഒളിംപിക്‌സില്‍ മെഡല്‍ നേടിയ എല്ലാ താരങ്ങള്‍ക്കും ഒരു കോടി വീതം ബൈജൂസ് ആപ് പ്രഖ്യാപിച്ചിരുന്നു. ഈ ഒരുകോടിയും താരത്തിന് ലഭിക്കും. മറിച്ച് സംസ്ഥാനത്തുനിന്ന് ഒരു പാരിതോഷികവും താരത്തിന് ഇതുവരെ ലഭിച്ചിട്ടില്ല.