തിരുവനന്തപുരം: തുടര്‍ച്ചയായ രണ്ടാം നാളും സഭ ബഹിഷ്‌ക്കരിച്ച് പ്രതിപക്ഷം. ഡോളര്‍ കടത്ത് ആരോപണത്തില്‍ മുഖ്യമന്ത്രി മറുപടി പറയാത്തതാണ് പ്രതിഷേധത്തിന് ആധാരം. സഭക്കു പുറത്ത് അഴിമതിവിരുദ്ധ സംരക്ഷണ മതില്‍ തീര്‍ത്താണ് പ്രതിപക്ഷം പ്രതിഷേധിക്കുന്നത്. ഒറ്റവരിയായാണ് പ്രതിപക്ഷം സഭയില്‍ നിന്ന് പുറത്തെത്തിയത്.

ജനാധിപത്യത്തിന്റെ ഉദാത്തമായ ലക്ഷം എത്തിപ്പിടിക്കാന്‍ സഭയില്‍ വിഷയങ്ങള്‍ ചര്‍ച്ച ചെയ്യണമെന്ന് പ്രതിപക്ഷ നേതാവ് വി.ഡി സതീശന്‍ ആവശ്യപ്പെട്ടു. എന്നാല്‍ സഭയുടെ നേതാവായ മുഖ്യമന്ത്രി വിഷയം ചര്‍ച്ച ചെയ്യാന്‍ തയ്യാറാവുന്നില്ല. മുഖ്യമന്ത്രിക്കെതിരായി ഡോളര്‍ കടത്തിയെന്ന് തെളിവുകളുടെ ബലത്തില്‍ ആരോപണമുയരുമ്പോള്‍ അതിന് മറുപടി പറയാതിരിക്കുകയാണ് മുഖ്യമന്ത്രിയെന്ന് അദ്ദേഹം കുറ്റപ്പെടുത്തി. സര്‍ക്കാറിന്റെ തെറ്റായ നടപടികള്‍ക്കെതിരെ കേരളത്തിലെ ജനങ്ങളെ അപമാനിക്കുന്ന നടപടികള്‍ക്കെതിരെ പ്രതിപക്ഷം നടത്തുന്ന പോരാട്ടത്തെ പുറത്തേക്ക് കൊണ്ടു വരികയാണെന്ന് അദ്ദേഹം പറഞ്ഞു. ഉമ്മന്‍ ചാണ്ടിക്കും പിണറായിക്കും ഒരേ നീതിയാണ് വേണ്ടതെന്നും അദ്ദേഹം ചൂണ്ടിക്കാട്ടി.

നിയമസഭയില്‍ മുഖ്യമന്ത്രിക്കെതിരെ പ്രതിപക്ഷം ബാനര്‍ ഉയര്‍ത്തിയിരുന്നു. ഡോളര്‍ കടത്ത് ആരോപണത്തില്‍ മുഖ്യമന്ത്രി മറുപടി പറയണമെന്ന് ആവശ്യപ്പെട്ട പ്രതിപക്ഷം സഭയില്‍ മുദ്രാവാക്യം വിളിയും ഉയര്‍ത്തിയിരുന്നു.

ഇന്നലെയും വിഷയം ചര്‍ച്ച ചെയ്യാത്തതില്‍ പ്രതിഷേധിച്ച് പ്രതിപക്ഷം നിയമസഭ ബഹിഷ്‌കരിച്ചിരുന്നു. കോടതിയുടെ പരിഗണനയില്‍ ഇരിക്കുന്ന വിഷയത്തില്‍ അടിയന്തര പ്രമേയം അവതരിപ്പിക്കാന്‍ കഴിയില്ലെന്ന് സ്പീക്കറും നിയമമന്ത്രിയും വ്യക്തമാക്കി. ശബരിമല അടക്കം കോടതിയുടെ പരിഗണനയിലിരിക്കുന്ന വിഷയങ്ങള്‍ ചര്‍ച്ച ചെയ്തിട്ടുണ്ടെന്ന് പ്രതിപക്ഷനേതാവ് ചൂണ്ടിക്കാട്ടിയെങ്കിലും സ്പീക്കര്‍ വഴങ്ങിയില്ല. അടിയന്തര പ്രമേയ നോട്ടിസ് സ്പീക്കര്‍ തള്ളിയതിന് പിന്നാലെ നിയമസഭക്ക് പുറത്ത് പ്രതീകാത്മക സഭ ചേര്‍ന്നായിരുന്നു പ്രതിപക്ഷം പ്രതിഷേധിച്ചത്.