മക്ക: അറഫയില്‍ ഈ വര്‍ഷം ഒരുങ്ങുന്നത് 82,000 പേര്‍ക്കുള്ള ചൂട് പ്രതിരോധ ടെന്റുകള്‍. 12,000 സ്‌ക്വയര്‍ മീറ്ററില്‍ ഒരുങ്ങുന്ന ടെന്റുകള്‍ യൂറോപ്യന്‍ മാതൃകയിലാണ് സജ്ജീകരിച്ചിരിക്കുന്നത്.
40 മില്യന്‍ സഊദി റിയാല്‍ ചെലവില്‍ നിര്‍മിച്ച ശീതീകരണ ടെന്റുകള്‍ തുര്‍ക്കി, യൂറോപ്പ്, അമേരിക്ക, ആസ്‌ത്രേലിയ എന്നിവിടങ്ങളില്‍ നിന്നുള്ള തീര്‍ഥാടകര്‍ക്കു മാത്രമാണ് ഉപകാരപ്പെടുക.
പുതുതായി തയാറാകുന്ന ടെന്റുകള്‍ പഴയ ടെന്റുകളുമായി കൂട്ടിയോജിപ്പിച്ചായിരിക്കും പ്രവര്‍ത്തനമെന്ന്  ത്വവാഫ എസ്റ്റാബ്ലിഷ്‌മെന്റ് ഡയറക്ടര്‍  ബോര്‍ഡ് ചെയര്‍മാന്‍ താരിഖ് അന്‍ഖവി വ്യക്തമാക്കി. ഈ വര്‍ഷം 72,000 തീര്‍ഥാടകരാണ് തുര്‍ക്കിയില്‍ നിന്നു മാത്രമെത്തുന്നത്. കനത്ത ചൂടില്‍ നിന്ന് തീര്‍ഥാടകര്‍ക്ക് സൗകര്യം ഒരുക്കുന്നതില്‍ ത്വവാഫ എസ്റ്റാബ്ലിഷ്‌മെന്റ് കമ്മിറ്റി ഘട്ടംഘട്ടമായി മികച്ച സേവനംനല്‍കാന്‍ തയാറായിക്കൊണ്ടിരിക്കുകയാണെന്നും അദ്ദേഹം പറഞ്ഞു.
തുര്‍ക്കി, യൂറോപ്പ്, അമേരിക്ക, ആസ്‌ത്രേലിയ എന്നിവിടങ്ങളില്‍ നിന്നുള്ള 1,80,000 തീര്‍ഥാടകര്‍ക്കായി  ത്വവാഫ എസ്റ്റാബ്ലിഷ്‌മെന്റ് കമ്മിറ്റിയുടെ കീഴില്‍ 43 ഫീല്‍ഡ് ഓഫിസര്‍മാര്‍ നിലവിലുണ്ട്. 85 ശതമാനം യൂറോപ്യന്‍ തീര്‍ഥാടകര്‍ക്കായുള്ള സൗകര്യങ്ങള്‍ ഇതിനകം പൂര്‍ത്തീകരിച്ചതായി അദ്ദേഹം പറഞ്ഞു.
ത്വവാഫ എസ്റ്റാബ്ലിഷ്‌മെന്റ് കമ്മിറ്റിയുടെ കീഴിലായി വിവിധ രാജ്യങ്ങളിലെ തീര്‍ഥാടകര്‍ക്കായി 400 മുത്വവിഫുമാര്‍ രംഗത്തുണ്ട്. ഇവിടെ വൈദ്യുതിക്കായി കൂടുതല്‍ ജനറേറ്ററുകള്‍ സജ്ജീകരിച്ചിട്ടുണ്ട്. ശീതീകരണ വായുവിന്റെ സുഗമമായ ഒഴുക്കിനു ടെന്റുകള്‍ തമ്മിലുള്ള ദൂരം 48 മുതല്‍ 32 മീറ്ററായി കുറച്ചിട്ടുണ്ട്.
അതേസമയം, ഈ വര്‍ഷത്തെ ഹജ്ജ് സീസണ്‍ ഉയര്‍ന്ന താപനിലയിലായിരിക്കുമെന്നു പ്രസിഡന്‍സി ഓഫ് മെട്രോളജി ആന്‍ഡ് എന്‍വയോണ്‍മെന്റ് വ്യക്തമാക്കി. കനത്ത മഴയും ഇടിയും ഉണ്ടാകാന്‍ സാധ്യതയുണ്ടെന്നും കാലാവസ്ഥാ വകുപ്പ് മുന്നറിയിപ്പു നല്‍കി.