കൊപ്പം: വിളയൂര്‍ ഗ്രാമപഞ്ചായത്തിലെ പുലാമന്തോള്‍ പാലത്തിന് സമീപത്തെ തടയണ ഭാഗത്തേക്ക് പുലാമന്തോള്‍ അങ്ങാടിയില്‍ നിന്നും സ്വകാര്യസ്ഥാപനത്തില്‍ നിന്നും മാലിന്യം ഒഴുകുന്നുവെന്ന പരാതിയുടെ അടിസ്ഥാനത്തില്‍ ആയോഗ്യ വകുപ്പധികൃതര്‍ സ്ഥലം സന്ദര്‍ശിച്ചു. കൊപ്പം കമ്മ്യൂണിറ്റി ഹെല്‍ത്ത് സെന്റര്‍ സുപ്രണ്ട് ഡോ. ഗീതയുടെ നേതൃത്വത്തില്‍ ഹെല്‍ത്ത് ഇന്‍സ്‌പെക്ടര്‍ വി.ടി മുഹമ്മദ്, ജൂനിയര്‍ ഹെല്‍ത്ത് ഇന്‍സ്‌പെക്ടര്‍ അശോകന്‍ എന്നിവരാണ് സന്ദര്‍ശനം നടത്തിയത്.
വിളയൂര്‍ ജല അതോറിറ്റി പമ്പിങ് സ്റ്റേഷനില്‍ നിന്നും വെള്ളം ശേഖരിച്ച്  കോഴിക്കോട് റീജ്യണല്‍ അനലറ്റിക്കല്‍ ലാബിലേക്ക് പരിശോധനക്കയച്ചു. ഇതര സംസ്ഥാന തൊഴിലാളികള്‍ താമസിക്കുന്ന കെട്ടിടങ്ങളില്‍ വേണ്ടത്ര ശൗചാലയമില്ലന്ന പരാതിയില്‍ താമസിക്കുന്നിടങ്ങളില്‍ സംഘം പരിശോധന നടത്തി വേണ്ട നിര്‍ദേശങ്ങള്‍ നല്‍കി.
പാലത്തിന് സമീപവും പമ്പ് ഹൗസിന് സമീപവും മുന്നറിയിപ്പ് ബോര്‍ഡുകള്‍ സ്ഥാപിച്ചു. മാലിന്യങ്ങള്‍ നിക്ഷേപിക്കുന്നവര്‍ക്കെതിരേ കര്‍ശന നടപടി സ്വീകരിക്കുമെന്നും അറിയിച്ചു.