കോഴിക്കോട്: കോര്‍പറേഷന്റെതടക്കം 17 അക്കൗണ്ടുകളില്‍ നിന്ന് 21.29 കോടിയുടെ ക്രമക്കേട് നടത്തി, 12.68 കോടി രൂപ തട്ടിയ കേസില്‍ പണം തിരിമറി നടത്തിയത് ഓഹരി വ്യാപാരത്തിലുണ്ടായ നഷ്ടം നികത്താനെന്ന് പ്രതി റിജില്‍.

ഭവനവായ്പയെടുത്ത 50 ലക്ഷം ഓഹരിവിപണിയില്‍ നഷ്ടമായപ്പോള്‍ തട്ടിപ്പ് നടത്തിയെന്നാണ് മൊഴി. തട്ടിയെടുത്ത പണം കൊണ്ട് വീടുപണി പൂര്‍ത്തിയാക്കി. പേഴ്‌സണല്‍ ലോണായി എടുത്ത 25 ലക്ഷം രൂപയിലേറെ ഓഹരി വിപണിയില്‍ നഷ്ടമായി. ഈ ലോണിന്റെ ഇ.എം.ഐ അടച്ചിരുന്നത് കോര്‍പറേഷന്‍ അക്കൗണ്ടിലെ പണം ഉപയോഗിച്ചായിരുന്നുവെന്നും റിജില്‍ മൊഴി നല്‍കി.

റിജിലിന്റെ അക്കൗണ്ടില്‍ ബാക്കിയുള്ളത് 7 ലക്ഷം രൂപ മാത്രമാണ്. ബാക്കി തുകയെല്ലാം ഓഹരിവിപണിയിലൂടെ നഷ്ടമായി. തട്ടിപ്പ് നടത്തിയത്് ഒറ്റക്കാണെന്നും മറ്റാരും കൂട്ടിനുണ്ടായിരുന്നില്ലെന്നും റിജില്‍ അന്വേഷണ ഉദ്യോഗസ്ഥരോട് പറഞ്ഞു.

പി.എന്‍.ബി ബാങ്കിലെ ലിങ്ക് റോഡ് ശാഖയിലെ അക്കൗണ്ടുകളില്‍ നിന്ന് കോര്‍പറേഷന്റേതുള്‍പ്പെടെ കോടികള്‍ തട്ടിയെടുത്ത കേസില്‍ ഒളിവിലായിരുന്ന റിജിലിനെ ബുധനാഴ്ച്ച വൈകീട്ടാണ് ക്രൈംബ്രാഞ്ച് പിടികൂടിയത്. വീടിനു സമീപം കുറ്റേരിമ്മലെ ബന്ധുവീട്ടില്‍ നിന്നാണ് പ്രതി പിടിയിലായത്. 12 കോടി 68 ലക്ഷം രൂപയാണ് റിജില്‍ ബാങ്കില്‍ നിന്ന് തട്ടിയെടുത്തത്. റിജിലിനെ ഇന്ന് കോടതിയില്‍ ഹാജരാക്കും,