കോട്ടയം: കുടുംബകലഹത്തെ തുടര്‍ന്ന് പാലായില്‍ മകനുനേര്‍ക്ക് പിതാവിന്റെ ആസിഡാക്രമണം. പാലാ കാഞ്ഞിരത്തുംകുന്നേല്‍ ഷിനുവിന്റെ ദേഹത്താണ് പിതാവ് ഗോപാലകൃഷ്ണന്‍ ഉറങ്ങിക്കിടക്കുമ്പോള്‍ ആസിഡൊഴിച്ചത്. ഷിനു സ്ഥിരമായി മദ്യപിച്ചെത്തി വീട്ടില്‍ വഴക്കുണ്ടാക്കാറുണ്ടെന്നാണ് പൊലിസ് പറയുന്നത്. ഗോപാലകൃഷ്ണനെ പൊലിസ് അറസ്റ്റ് ചെയ്തു. 75 ശതമാനവും പെള്ളലേറ്റ 31കാരനായ ഷിനു അത്യാസന്ന നിലയിലാണുള്ളത്. ഇയാള്‍ അപകടനില തരണം ചെയ്തിട്ടില്ല.

കഴിഞ്ഞ ദിവസവും ഇത്തരത്തില്‍ അച്ഛനും മകനും തമ്മില്‍ വഴക്കുണ്ടായി. ശേഷം ഷിനു ഉറങ്ങാന്‍ പോയി. പിന്നീടാണ് ഗോപാലകൃഷ്ണന്‍ ആസിഡ് ഷിനുവിന്റെ ദേഹത്തൊഴിച്ചത്. എവിടെ നിന്നാണ് ഇയാള്‍ക്ക് ആസിഡ് ലഭിച്ചതെന്ന് വ്യക്തമല്ല.
സംഭവത്തിന് പിന്നാലെ സ്‌കൂട്ടറെടുത്ത് ഗോപാലകൃഷ്ണന്‍ ഒളിവില്‍ പോയി. പൊലിസ് മഫ്തിയില്‍ നടത്തിയ തിരച്ചിലില്‍ ഇയാളെ പിടികൂടുകയായിരുന്നു. കോട്ടയം മെഡിക്കല്‍ കോളജ് ആശുപത്രിയിലാണ് ഇയാള്‍ ചികിത്സയില്‍ കഴിയുന്നത്. ഏറ്റുമാനൂര്‍ മജിസ്‌ട്രേറ്റ് ഷിനുവിന്റെ മൊഴി രേഖപ്പെടുത്തിയിട്ടുണ്ട്.