വാഷിങ്ടണ്‍: മഹാത്മാഗാന്ധിയുടെ ജന്മദിനം അടുത്ത മാസം ആചരിക്കാനിരിക്കേ, അദ്ദേഹത്തിന്റെ ആശയങ്ങള്‍ എങ്ങനെ പ്രാവര്‍ത്തികമാക്കാമെന്നു ലോകം പഠിക്കണമെന്ന് യു.എസ് പ്രസിഡന്റ് ജോ ബൈഡന്‍. ജനാധിപത്യം സംരക്ഷിക്കാന്‍ ഇന്ത്യയും യു.എസും പ്രതിജ്ഞാബദ്ധമാണെന്ന് മോദിയുടെ മറുപടി. 

ത്രിദിന സന്ദര്‍ശനത്തിന് അമേരിക്കയിലെത്തിയ പ്രധാനമന്ത്രി നരേന്ദ്രമോദി യു.എസ് പ്രസിഡന്റ് ജോ ബൈഡനുമായി നടത്തിയ കൂടിക്കാഴ്ചയിലാണ് ഇരു നേതാക്കളുടെയും പ്രതികരണം. ഇന്നലെ വൈറ്റ് ഹൗസിലായിരുന്നു കൂടിക്കാഴ്ച. ജോ ബൈഡന്‍ യു.എസ് പ്രസിഡന്റായ ശേഷം ആദ്യമാണ് ഇരുവരും തമ്മില്‍ കൂടിക്കാഴ്ച നടക്കുന്നത്.ലോകത്തെ ശക്തമായ ജനാധിപത്യ രാജ്യങ്ങളായ ഇന്ത്യയും യു.എസും തമ്മിലുള്ള ബന്ധം ശക്തമാക്കാന്‍ ഈ കൂടിക്കാഴ്ച ഉപകരിക്കുമെന്നും അതു ലോകത്തിനു പ്രയോജനപ്പെടുമെന്നും ബൈഡന്‍ പറഞ്ഞു.പരസ്പര വ്യാപാര സഹകരണം, കൊവിഡ് വ്യാപനം തുടങ്ങി വിവിധ കാര്യങ്ങള്‍ ഇരു നേതാക്കളും ചര്‍ച്ച ചെയ്തു.