ഫറോക്ക്: കടലുണ്ടിയില്‍ രണ്ടരക്കോടി ചെലവിട്ട് പുതിയ കമ്മ്യൂനിറ്റി ഹാള്‍ നിര്‍മിക്കുന്നു. എം.എല്‍.എയുടെ ആസ്തി വികസന ഫണ്ട് ഉപയോഗിച്ചാണ് പുതിയ കമ്മ്യൂനിറ്റി ഹാള്‍ നിര്‍മിക്കുന്നത്. ഇതിനായി നിലവിലെ കമ്മ്യൂനിറ്റി ഹാള്‍ പൊളിച്ചു മാറ്റുന്ന ജോലി ഉടന്‍ ആരംഭിക്കും.
കടലുണ്ടി ഗ്രാമപഞ്ചായത്തിന് കീഴില്‍ പ്രബോധിനി പൂച്ചേരിക്കുന്നിലെ കമ്മ്യൂനിറ്റി ഹാള്‍ 1985 ലാണ് നിര്‍മിച്ചത്. കാലപ്പഴക്കത്താല്‍ തകര്‍ച്ചാ ഭീഷണിയിലായതോടെയാണ് പുതിയ കമ്യൂനിറ്റി ഹാള്‍ നിര്‍മിക്കുന്നത്. പഴയത് പൂര്‍ണമായും പൊളിച്ചു നീക്കി ആധുനിക സജ്ജീകരണങ്ങളോടെയാണ് കമ്മ്യൂനിറ്റി ഹാള്‍ നിര്‍മാണം.
പ്രവേശന കവാടത്തില്‍ നിന്നു തന്നെ നേരിട്ട് പ്രവേശിക്കാവുന്ന രീതിയിലുളള വിശാലമായ ഹാള്‍, കൂടുതല്‍ പേര്‍ക്ക് ഇരിക്കാവുന്ന ഭക്ഷണ ശാല, എല്ലാവിധ സൗകര്യങ്ങളമുളള പാചകപ്പുര, ബാല്‍ക്കണി തുടങ്ങിയ സൗകര്യങ്ങളോടെയാണ് പുതിയ കമ്മ്യൂനിറ്റി ഹാള്‍ നിര്‍മാണം. മെച്ചപ്പെട്ട രീതിയിലുളള ശുചിമുറികളും സജ്ജീകരിക്കും. പഴയത് പൊളിച്ചു മാറ്റുന്ന മുറക്ക് പുതിയ കമ്മ്യൂനിറ്റി ഹാളിന്റെ നിര്‍മാണം ആരംഭിക്കുമെന്ന് അധികൃതര്‍ അറിയിച്ചു.