കോഴിക്കോട്: സന്തോഷ് ട്രോഫിയില്‍ രാജസ്ഥാനെ ഗോളില്‍ മുക്കി കേരളം. കോഴിക്കോട് ഇ.എം.എസ് കോര്‍പറേഷന്‍ സ്റ്റേഡിയത്തില്‍ നടന്ന മത്സരത്തില്‍ എതിരില്ലാത്ത ഏഴ് ഗോളിനാണ് നിലവിലെ ചാമ്പ്യന്‍മാര്‍ രാജസ്ഥാനെ തകര്‍ത്തത്. കളിയിലുടനീളം ആധിപത്യം പുലര്‍ത്തിയ കേരളം രാജസ്ഥാന്‍ പോസ്റ്റിലേക്ക് അക്രമം അഴിച്ചുവിട്ടുകൊണ്ടേയിരുന്നു.

കളിയുടെ ആറാം മിനിറ്റില്‍ തന്നെ വലകുലുക്കി ഗില്‍ബര്‍ട്ടാണ് ഗോള്‍മഴക്ക് തുടക്കമിട്ടത്. പന്ത്രണ്ടാം മിനിറ്റില്‍ തന്നെ വിഘ്‌നേഷിന്റെതായിരുന്നു ഗോള്‍. 20ാം മിനിറ്റില്‍ വീണ്ടും വിഘ്‌നേഷിന്റെ ഗോള്‍ പിറന്നു. നാലാമത്തെ ഗോള്‍ നരേഷിന്റെതായിരുന്നു. രാജസ്ഥാന്‍ പ്രതിരോധകോട്ട പൊളിച്ച് നരേഷ് പന്ത് വലയിലെത്തിച്ചു. 35ാം മിനിറ്റില്‍ നരേഷിന്റെ വക അഞ്ചാമത്തെതും സ്‌കോര്‍ചെയ്തു. രണ്ടാം പകുതിയിലും കേരളം ഗോളടി വീണ്ടും തുടര്‍ന്നു.

54ാം മിനിറ്റില്‍ ആറാം ഗോള് പിറന്നു. ഇത്തവണ റിസ്‌വാനാണ് വലകുലുക്കിയത്. 81ാം മിനിറ്റില്‍ വീണ്ടും റിസ്‌വാന്‍. ഇതോടെ കേരളം തങ്ങളുടെ കോട്ട പൂര്‍ത്തിയാക്കി. 7-0 എന്നനിലയില്‍ കളിയവസാനിച്ചു. 29ന് ബീഹാറിനെതിരെയാണ് കേരളത്തിന്റെ അടുത്ത മത്സരം.