മലപ്പുറം: കെട്ടിടമുള്ള ഭൂമി വാങ്ങുന്നവര്‍ക്ക് തിരിച്ചടിയായി  മതിപ്പുവിലയില്‍ വന്‍വര്‍ധന. ഭൂമിയുടെ രജിസ്‌ട്രേഷന്‍ ചെലവിനു പുറമെ, കെട്ടിടങ്ങളുടെ കൈമാറ്റത്തിനായി നിശ്ചയിക്കുന്ന മതിപ്പുവിലയാണ് കുത്തനെ വര്‍ധിപ്പിച്ചത്. കെട്ടിടത്തിന് പുതുക്കിയ നിരക്കിലുള്ള മതിപ്പുവിലയുടെ എട്ട് ശതമാനം മുദ്രപ്പത്രവും രണ്ട് ശതമാനം ഫീസും നല്‍കണമെന്നാണ് രജിസ്‌ട്രേഷന്‍ വകുപ്പിന്റെ പുതിയ നിര്‍ദേശം.

 

ഭൂമിയിലുള്ള കെട്ടിടങ്ങളുടെ കൈമാറ്റത്തില്‍ തറവിസ്തീര്‍ണം കണക്കാക്കിയാണ് നിലവില്‍ എന്‍ജിനിയര്‍മാര്‍ മതിപ്പുവില നിശ്ചയിക്കുന്നത്. എന്നാല്‍ കേന്ദ്ര പൊതുമരാമത്ത്‌വകുപ്പിന്റെ 2018ലെ ഡല്‍ഹിയിലെ നിരക്ക്(ഡി.എസ്.ആര്‍ 2018) അടിസ്ഥാനമാക്കി കെട്ടിടങ്ങളുടെ മതിപ്പുവില കണക്കാക്കാനാണ് സംസ്ഥാന രജിസ്‌ട്രേഷന്‍വകുപ്പ് കഴിഞ്ഞദിവസം അംഗീകൃത എന്‍ജിനിയര്‍മാര്‍ക്ക് നിര്‍ദേശം നല്‍കിയത്. 

 

ഡല്‍ഹിയില്‍ കെട്ടിട നിര്‍മാണ ചെലവ് സ്‌ക്വയര്‍ ഫീറ്റിന് 1561 രൂപയാണ്. വീട് വൈദ്യുതീകരണം, പ്ലംബിംഗ്, സാനിറ്ററി സൗകര്യങ്ങള്‍ ഉണ്ടെങ്കില്‍ 398 രൂപ അധികം നല്‍കണം. സ്‌ക്വയര്‍ ഫീറ്റിന് ഇതോടെ 1959 രൂപയാകും. ഡല്‍ഹി നിരക്കിന്റെ 35 മുതല്‍ 42 വരെ ശതമാനം അധികം കണക്കാക്കിയാണ് മറ്റു  പ്രദേശങ്ങളിലേക്കുള്ള നിരക്ക് നിശ്ചയിക്കുന്നത്. ഇതോടെ വസ്തുവാങ്ങുന്നയാള്‍ക്ക് ബാധ്യത ഇരട്ടിയാവുകയാണ്.

 

ഗ്രാമീണമേഖലയില്‍ 15 ലക്ഷം രൂപയ്ക്ക് 1000 സ്‌ക്വയര്‍ ഫീറ്റ് വീട് നിര്‍മിക്കാനാകും. ഈ വീടിന് ഒന്നര ലക്ഷം രൂപ മാത്രമായിരുന്നു രജിസ്‌ട്രേഷന്‍ ചെലവ്. മതിപ്പുവില വര്‍ധനവിന്റെ മറവില്‍ ഇത് ഒറ്റയടിക്ക് രണ്ടര ലക്ഷത്തിലധികം രൂപയാക്കി. മറ്റു കെട്ടിടങ്ങള്‍ക്ക് സ്‌ക്വയര്‍ ഫീറ്റിന് 3600 രൂപ മതിപ്പുവില കണക്കാക്കിയതോടെ ഇവയുടെ കൈമാറ്റ ചെലവും ഗണ്യമായി വര്‍ധിക്കും.