സ്വര്‍ണവില പുതിയ ഉയരത്തിലേക്ക്; പവന് 600 രൂപ വര്‍ധിച്ച് 46,760 രൂപയായി

സംസ്ഥാനത്ത് സ്വര്‍ണവില വീണ്ടും റെക്കോര്‍ഡ് ഭേദിച്ചു. ഗ്രാമിന് 75 രൂപയും പവന് 600 രൂപയും വര്‍ധിച്ച് ഗ്രാമിന് 5845 രൂപയിലും പവന് 46,760 രൂപയിലുമാണ് ശനിയാഴ്ച്ച വ്യാപാരം പുരോഗമിക്കുന്നത്. ചരിത്രത്തിലെ ഏറ്റവും ഉയര്‍ന്ന വിലയാണിത്. മൂന്നു ദിവസം മുന്‍പുണ്ടായിരുന്ന റെക്കോര്‍ഡാണ് ഇന്ന് മറികടന്നത്.

പണിക്കൂലിയും ജിഎസ്ടി അടക്കമുള്ള ടാക്സുകളും കൂടിയാകുമ്പോള്‍ പവന്‍റെ വില അരലക്ഷത്തോളം എത്തും. 46160 രൂപയായിരുന്നു ഒരു പവന്‍ സ്വര്‍ണത്തിന്‍റെ ഇന്നലത്തെ വില. ഇന്നലെ പവന് 160 രൂപ വര്‍ധിച്ചിരുന്നു.

ജനുവരിയില്‍ 40,360 രൂപയ്ക്ക് ആരംഭിച്ച സ്വർണവില ഒരു വർഷം പിന്നിടാൻ ഇനിയും ദിവസങ്ങൾ ബാക്കി നിൽക്കെ 5,800 രൂപ വരെയാണ് ഒരു പവന് ഉയര്‍ന്നത്.