ചെങ്ങന്നൂര്‍: മോന്‍സണ്‍ മാവുങ്കലിനെ കൂട്ടുപിടിച്ച് പന്തളം കൊട്ടാരത്തിന്റേതെന്ന പേരില്‍ പ്രചരിപ്പിച്ച ചെമ്പോല തിട്ടൂരം വിവാദങ്ങള്‍ക്കു പിന്നില്‍ വന്‍ ഗൂഢാലോചനയെന്ന് പന്തളം കൊട്ടാരം. സംഭവത്തെക്കുറിച്ച് പുരാവസ്തു വകുപ്പ് അന്വേഷിക്കണമെന്നും പന്താളം കൊട്ടാരം അധികൃതര്‍ അറിയിച്ചു. ശബരിമല വിവാദങ്ങള്‍ക്കിടെയാണ് ആചാര സംരക്ഷണത്തിനായി ചെമ്പോല തിട്ടൂരം ഉയര്‍ന്നുവന്നത്.

ഇത്തരം ചെമ്പോലയെക്കുറിച്ച് പന്തളം കൊട്ടാരത്തിന് അറിവില്ല. ചെമ്പോലയുടെ ആധികാരികത പരിശോധിക്കണമെന്നാവശ്യപ്പെട്ട് കേന്ദ്ര പുരാവസ്തു വകുപ്പിന് പരാതി നല്‍കുമെന്നും കൊട്ടാരം നിര്‍വാഹക സംഘം പ്രസിഡന്റ് ശശികുമാര വര്‍മ പറഞ്ഞു. വ്യാജ രേഖയെങ്കില്‍ വാര്‍ത്ത നല്‍കിയ മാധ്യമങ്ങള്‍ക്കെതിരേ നിയമ നടപടി സ്വീകരിക്കുമെന്നും ശശികുമാര വര്‍മ വ്യക്തമാക്കി.

അതേ സമയം കഴിഞ്ഞ ദിവസം ശബരിമലക്കെതിരെ മാധ്യമങ്ങള്‍ വ്യാജവാര്‍ത്ത ചമയ്ക്കുന്നതിനു കൂട്ടുപിടിച്ചത് പുരാവസ്തു തട്ടിപ്പുകാരന്‍ മോന്‍സണ്‍ മാവുങ്കലിനെയാണെന്നു അഭിഭാഷകനും രാഷ്ട്രീയ പ്രവര്‍ത്തകനുമായ ശങ്കു.ടി ദാസ് ആരോപിച്ചത്.
ശബരിമല യുവതി പ്രവേശന വിഷയം കത്തിനില്‍ക്കുന്ന സമയത്താണ് മോന്‍സണ്‍ മാവുങ്കലിനെ കൂട്ടുപിടിച്ച് വ്യാജവാര്‍ത്ത പ്രചരിപ്പിച്ചതെന്നാണ് ആരോപണം. ചില മാധ്യമങ്ങള്‍ വാര്‍ത്ത ഏറ്റുപിടിച്ചു. മോന്‍സണ്‍ അറസ്റ്റിലായതോടെയാണ് ശബരിമലയിലെ ആചാരലംഘനത്തിന് സൈദ്ധാന്തിക ഭാഷ്യം ചമയ്ക്കാന്‍ സി.പി.എമ്മും സര്‍ക്കാരും തട്ടിപ്പുകാരെയാണ് കൂട്ടുപിടിച്ചതെന്ന് വ്യക്തമായതെന്നാണ് അദ്ദേഹം ഫേസ്ബുക്ക് പോസ്റ്റില്‍ അവകാശപ്പെട്ടത്.

'കലൂര്‍ സ്വദേശി ഡോ. മോന്‍സണ്‍ മാവുങ്കലിന്റെ സ്വകാര്യ പുരാവസ്തു ശേഖരത്തിലാണ് ഈ രേഖയുള്ളത്.'
അതെ. ശ്രീകൃഷ്ണന്‍ വെണ്ണ കട്ട് കുടിച്ച കുടവും, ഗണപതി മഹാഭാരതം എഴുതിയ താളിയോലയും, മോശയുടെ അംശവടിയും, യേശുവിന്റെ കാല്‍പ്പാദം പതിഞ്ഞ മണ്ണ് കുഴച്ചുണ്ടാക്കിയ കുരിശും, മുഹമ്മദ് നബി ഉപയോഗിച്ചിരുന്ന ഒലീവെണ്ണ വിളക്കും, ടിപ്പുവിന്റെ സിംഹാസനവും ഒക്കെ സൂക്ഷിച്ചിരിക്കുന്ന മോന്‍സണ്‍ മാവുങ്കലിന്റെ സ്വകാര്യ പുരാവസ്തു ശേഖരത്തില്‍ മുങ്ങി തപ്പിയാണ് ശ്രീമാന്‍ സഹിന്‍ ആന്റണി ഈ ചെമ്പോല തിട്ടൂരവും കണ്ടെടുത്തത് എന്ന്.
അത് വെച്ചാണ് അയാള്‍ പ്രബുദ്ധ മലയാളികളെ മുഴുവന്‍ പമ്പര വിഡ്ഢികള്‍ ആക്കിയത്.
ഇനി സഹിന്‍ ആന്റണി പറയണം.
സഹിന്‍ ആന്റണിയെ വ്യാജ ചെമ്പ് തിട്ടൂരം കാണിച്ചു മോന്‍സണ്‍ മാവുങ്കല്‍ കബളിപ്പിച്ചതാണോ അതോ സഹിന്‍ ആന്റണിയുടെ ആവശ്യപ്രകാരം മോന്‍സണ്‍ മാവുങ്കല്‍ ഒരു വ്യാജ ചെമ്പ് തിട്ടൂരം നിര്‍മ്മിച്ചു കൊടുത്തതാണോ എന്ന്. അദ്ദേഹം കുറിപ്പില്‍ പറയുന്നു.