ഗസ്സയില്‍ സയണിസ്റ്റുകള്‍ ലക്ഷ്യമിടുന്നത് ഫലസ്തീന്‍ വംശഹത്യ, ഇസ്‌റാഈലിനെതിരെ ശക്തമായ നടപടി ആവശ്യപ്പെട്ട് ദക്ഷിണാഫ്രിക്ക അന്താരാഷ്ട്ര കോടതിയില്‍

ഹേഗ്: ഗസ്സയില്‍ ഫലസ്തീനുകളുടെ വംശഹത്യയാണ് ഇസ്‌റാഈല്‍ ലക്ഷ്യമിടുന്നതെന്ന് ചൂണ്ടിക്കാണിച്ച് ദക്ഷിണാഫ്രിക്ക അന്താരാഷ്ട്ര നീതിന്യായ കോടതിയെ (ഐ.സി.ജെ) സമീപിച്ചു. 1948ലെ വംശഹത്യ കണ്‍വെന്‍ഷനിലെ കരാറിന്റെ നഗ്നമായ ലംഘനമാണിതെന്നും ദക്ഷിണാഫ്രിക്ക കൂട്ടിച്ചേര്‍ത്തു.

'ഇസ്‌റാഈലിന്റെ പ്രവര്‍ത്തനങ്ങള്‍ വംശഹത്യാ സ്വഭാവമുള്ളതാണ്. പ്രത്യേക ലക്ഷ്യം മുന്നില്‍ കണ്ടാണ് അവരുടെ നീക്കങ്ങള്‍. ഗസ്സയിലെ ഫലസ്തീനികളെ പൂര്‍ണമായും ഉന്മൂലനം ചെയ്യുക എന്നതാണത്' ദക്ഷിണാഫ്രിക്ക പ്രസ്താവനയില്‍ പറയുന്നു. ഗസ്സ മുനമ്പില്‍ ഇസ്‌റാഈല്‍ നടത്തുന്ന നരമേധത്തില്‍ ദുരിതമനുഭവിക്കുന്ന സിവിലിയന്മാരുടെ ദുരവസ്ഥയില്‍ ദക്ഷിണാഫ്രിക്ക വളരെയധികം ആശങ്കാകുലരാണ്. മാനവികതക്കെതിരായ കുറ്റകൃത്യങ്ങളുടെയും യുദ്ധക്കുറ്റങ്ങളുടെയും തുടര്‍ച്ചയായ റിപ്പോര്‍ട്ടുകളാണ് പുറത്തുവരുന്നത്. ഗസ്സയില്‍ നടക്കുന്നത് കൂട്ടക്കൊലയാണ്, വംശഹത്യ അല്ലെങ്കില്‍ അനുബന്ധ കുറ്റകൃത്യങ്ങളുടെ പരിധിയില്‍ വരുന്നതാണിത്. ഇസ്‌റാഈലിന്റെ സൈനിക നടപടികളും പുറംതള്ളലും വംശഹത്യ സ്വഭാവമുള്ളതാണ്. കാരണം അവ ഫലസ്തീന്‍ ദേശീയ, വംശീയ ഉന്മൂലനം ലക്ഷ്യമിട്ടുള്ളതാണെന്നും 84 പേജുള്ള ഹരജിയില്‍ പറയുന്നു.

ഹരജി അടുത്തയാഴ്ച തന്നെ പരിഗണിക്കണമെന്നും ഗസ്സയില്‍ എല്ലാ സൈനിക നടപടികളും അവസാനിപ്പിക്കാനും വംശഹത്യ തടയാനും ഇസ്‌റാഈലിന് നിര്‍ദേശം നല്‍കണമെന്നും ദക്ഷിണാഫ്രിക്ക ആവശ്യപ്പെട്ടു.

എന്നാല്‍ അടിസ്ഥാനരഹിതമായ ആരോപണം എന്നാണ് ഇസ്‌റാഈല്‍ ഇതിനോട് പ്രതികരിച്ചത്. ദക്ഷിണാഫ്രിക്കയുടെ അവകാശവാദം കോടതിയെ ചൂഷണം ചെയ്യുന്നതാണെന്ന് ഇസ്‌റാഈല്‍ വിദേശകാര്യ മന്ത്രാലയ വക്താവ് ലിയോര്‍ ഹയാത്ത് പറഞ്ഞു.

ഇസ്‌റാഈല്‍ ആക്രമണങ്ങളില്‍ കൊല്ലപ്പെട്ട ഫലസ്തീനികളുടെ എണ്ണം 21,500 കഴിഞ്ഞു. അരലക്ഷത്തിലധികം പേര്‍ക്ക് പരിക്കേറ്റിട്ടുണ്ട്.