തിരുവനന്തപുരം: ക്രമസമാധാന ചുമതലയിലുണ്ടായിരുന്ന എ.ഡി.ജി.പി എം.ആര്‍.അജിത്കുമാര്‍ ആര്‍.എസ്.എസ് നേതാക്കളുമായി കൂടിക്കാഴ്ച നടത്തിയത് സംബന്ധിച്ചും പൊലിസിനെതിരെ ഉയര്‍ന്ന ആരോപണങ്ങളിലും നിയമസഭയില്‍ അടിയന്തരപ്രമേയ ചര്‍ച്ചയ്ക്ക് അനുമതി. എന്‍.ഷംസുദ്ദീന്റെ നേതൃത്വത്തില്‍ യുഡിഎഫ് എംഎല്‍എമാര്‍ നല്‍കിയ നോട്ടീസിനാണ് സ്പീക്കര്‍ അനുമതി നല്‍കിയത്. ഉച്ചയ്ക്ക് 12 മണി മുതല്‍ 2 മണിവരെയാകും അടിയന്തര പ്രമേയത്തിന്‍മേലുള്ള ചര്‍ച്ച. 

നിയമസഭയില്‍ തിങ്കളാഴ്ച നടന്ന സംഘര്‍ഷത്തെ തുടര്‍ന്ന് നാല് പ്രതിപക്ഷ എം.എല്‍.എമാര്‍ക്ക് സ്പീക്കര്‍ താക്കീത് നല്‍കി. മാ്ത്യു കുഴല്‍നാടന്‍, കെ.സി ബാലകൃഷ്ണന്‍, അന്‍വര്‍ സാദത്ത്, സജീവ് ജോസഫ് എന്നിവരെ താക്കീത് ചെയ്യുന്ന പ്രമേയം മന്ത്രി എം.ബി രാജേഷാണ് അവതരിപ്പിച്ചത്. നിയമസഭയില്‍ പാലിക്കേണ്ട മര്യാദയും സഭാചട്ടങ്ങളും പാലിക്കാത്തതിന്റെ പേരിലാണ് നടപടി. സ്പീക്കറെ അധിക്ഷേപിക്കുന്ന പ്രതിപക്ഷ നടപടി അംഗീകരിക്കാനാകില്ലെന്ന് മുഖ്യമന്ത്രി പറഞ്ഞു.