പോത്തന്‍കോട്: പട്ടാപ്പകല്‍ ഗുണ്ടാസംഘം വീട്ടില്‍ കയറി യുവാവിനെ വെട്ടിക്കൊന്ന സംഭവത്തില്‍ മൂന്നു പേര്‍ പിടിയില്‍
. ഓട്ടോ ഡ്രൈവര്‍ കണിയാപുരം സ്വദേശി രഞ്ജിത്(28) ആണ് പിടിയിലായത്. ഓട്ടോറിക്ഷ പൊലിസ് കസ്റ്റഡിയിലെടുത്തു. സംഘത്തിലെ ബാക്കിയുള്ളവര്‍ക്കായി അന്വേഷണം ഊര്‍ജിതമാക്കി.

കൊലപാതകത്തില്‍ നേരിട്ട് പങ്കെടുത്തയാളാണ് പിടിയിലായതെന്നാണ് സൂചന. ശനിയാഴ്ച്ച മുതല്‍ പൊലിസ് തിരുവനന്തപുരം ജില്ലയിലെ പല കേന്ദ്രങ്ങളിലായി പരിശോധന നടത്തിവരികയായിരുന്നു. കൊലപാതകത്തില്‍ 12 പേരാണ് നേരിട്ട് പങ്കെടുത്തതെന്നാണ് വിവരം. കൊലപാതകത്തിന് ശേഷം ബൈക്കിലും ഓട്ടോറിക്ഷയിലുമായി ഇവര്‍ രക്ഷപ്പെടുകയായിരുന്നു.

അതേസമയം കൊല്ലപ്പെട്ട സുധീഷിന്റെ പോസ്റ്റമോര്‍ട്ടം ഇന്ന് നടക്കും. ശരീരം മുഴുവന്‍ വെട്ടേറ്റ സുധീഷ് ആശുപത്രിയില്‍ എത്തുന്നതിന് മുന്‍പ് മരിച്ചിരുന്നു. വധശ്രമക്കേസില്‍ ഒളിവില്‍ കഴിയുമ്പോഴാണ് സുധീഷ് അതിക്രൂരമായി കൊല്ലപ്പെട്ടത്. സുധീഷിനെ ബന്ധുവീട്ടില്‍ കയറി വെട്ടിയ പ്രതികള്‍ പകതീരാതെ വെട്ടിയെടുത്ത കാല്‍ റോഡിലെറിഞ്ഞശേഷമാണ് രക്ഷപ്പെട്ടത്.