കുവൈത്ത് സിറ്റി:  കുവൈത്തിലെ റസിഡന്‍സ് നിയമലംഘകര്‍ക്ക് പൊതുമാപ്പ് ഉപയോഗിച്ച് രാജ്യം വിടാനും റെസിഡന്‍സി പുതുക്കാനുമുള്ള സമയങ്ങള്‍ പുറത്തിറക്കി ആഭ്യന്തര മന്ത്രാലയം. ഔദ്യോഗിക പ്രവൃത്തി സമയങ്ങളില്‍ രാവിലെ അനധികൃത താമസക്കാര്‍ക്ക് ഗവര്‍ണറേറ്റിലെ ശുഊന്‍ ഓഫിസില്‍ (റെസിഡന്‍സി അഫേഴ്‌സ്) പ്രശ്‌നം പരിഹരിക്കാം.

വൈകുന്നേരം മൂന്നു മണിമുതല്‍ രാത്രി എട്ടു മണി വരെയാണ് മറ്റൊരു സമയം. കുവൈത്ത് വിട്ടുപോയി തിരിച്ചുവരാന്‍ ആഗ്രഹിക്കുന്ന നിയമലംഘകര്‍ ഈ സമയത്ത് പാസ്‌പോര്‍ട്ടുമായോ ഔട്ട പാസ് പോലെയുള്ള യാത്രാരേഖകളുമായോ മുബാറക് അല്‍കബീര്‍ ഗവര്‍ണറേറ്റിലെയോ ഫര്‍വാനിയ ഗവര്‍ണറേറ്റിലെയോ ശുഊന്‍ ഓഫിസിലെത്തി പേര് രജിസ്റ്റര്‍ ചെയ്യണം.

ആഭ്യന്തര മന്ത്രാലയത്തിന്റെ സംവിധാനത്തില്‍ രജിസ്റ്റര്‍ ചെയ്ത പാസ്‌പോര്‍ട്ടുള്ള കുവൈത്ത് വിട്ടുപോകാന്‍ ആഗ്രഹിക്കുന്ന നിയമലംഘകര്‍ അഡ്മിനിസ്‌ട്രേഷന്‍ ഓഫിസുമായി ബന്ധപ്പെടേണ്ടതില്ല. നേരെ പോകാവുന്നതാണ്. 2024 ഏപ്രില്‍ 21 ഞായറാഴ്ച മുതല്‍ റെസിഡന്‍സി പ്രശ്‌നങ്ങള്‍ പരിഹരിക്കാനുള്ള സമയം നിലവില്‍ വന്നിട്ടുണ്ട്.