ആലപ്പുഴയിൽ ഇടിമിന്നലേറ്റ് സ്ട്രോങ് റൂമിന് സമീപത്തെ എട്ടോളം സിസിടിവി ക്യാമറകൾ കേടായി. ഇന്നലെ രാത്രി ഉണ്ടായ കനത്ത മഴയിലും ഇടിമിന്നലിലുമാണ് ക്യാമറകൾക്ക് കേടുപാടുകൾ സംഭവിച്ചത്. ആലപ്പുഴ സെൻറ് ജോസഫ് സ്കൂളിലെ സ്ട്രോങ് റൂമിന് സമീപത്താണ് സംഭവം.

ഒരു മണിക്കൂറിലേറെ നീണ്ടുനിന്ന കനത്ത മഴയും ഇടിമിന്നലുമാണ് ഇന്നലെ ആലപ്പുഴയിലുണ്ടായിരുന്നത്. ക്യാമറകൾ കേടായ വിവരം ജില്ലാ കളക്ടർ സ്ഥാനാർഥികളെ ഉടൻതന്നെ വിളിച്ച് അറിയിച്ചു. ആലപ്പുഴ നിയോജക മണ്ഡലത്തിലെ വോട്ടിംഗ് യന്ത്രങ്ങളാണ് ഇവിടെയുള്ളത്.

കേടുപാടുകൾ സംഭവിച്ച ആറെണ്ണം ഇന്നലെ അറ്റകുറ്റപ്പണികൾ നടത്തി. എന്നാൽ രണ്ട് ക്യാമറകൾ പൂർണമായി തകർന്നതിനാൽ അവ മാറ്റി പുതിയത് സ്ഥാപിക്കേണ്ടി വരും. ആലപ്പുഴയിലെ പ്രധാന വോട്ടെണ്ണൽ കേന്ദ്രം കൂടിയാണ് സെന്റ് ജോസഫ് സ്കൂൾ.