തിരുവനന്തപുരം: രാത്രിയില്‍ വൈദ്യുതി തടസപ്പെടുത്തുകയും ശേഷം റോഡില്‍ ബൈക്കുകളുടെ മത്സരയോട്ടം നടത്തുകയും ചെയ്തവര്‍ക്കെതിരെ പരാതിയുമായി നാട്ടുകാര്‍. പാറശ്ശാല പരശുവയ്ക്കലിന് സമീപം നെടിയാംകോട്ടിലാണ് സംഭവം. കെഎസ്ഇബി ട്രാന്‍സ്ഫോര്‍മറിന്റെ ഫ്യൂസ് ഇളക്കി മാറ്റിയാണ് സംഘം വൈദ്യുതി തടസപ്പെടുത്തിയത്. ഇത് ചോദ്യം ചെയ്യാനെത്തിയവരെ അസഭ്യം പറയുകയും ആക്രമിക്കാന്‍ ശ്രമിക്കുകയും ചെയ്തതായി പരാതി.

ഞായറാഴ്ച രാത്രിയായിരുന്നു സംഭവം. രണ്ടു യുവാക്കള്‍ ട്രാന്‍സ്ഫോര്‍മറിന്റെ ഫ്യൂസ് ഇളക്കി മാറ്റിയ ശേഷം റോഡില്‍ മത്സരയോട്ടം നടത്തുകയായിരുന്നു. ബൈക്കുകളുടെ ശബ്ദം കേട്ട് ചോദ്യം ചെയ്യാനെത്തിയ നാട്ടുകാരെ അസഭ്യം പറയുകയും ആയുധങ്ങളുമായി ആക്രമിക്കാന്‍ ശ്രമിക്കുകയും ചെയ്തു.

നാട്ടുകാര്‍ വിവരം അറിയിച്ചതിനെ തുടര്‍ന്ന് പൊലിസ് സ്ഥലത്തെത്തി. എന്നാല്‍ യുവാക്കളെ കണ്ടെത്താനായില്ല. ഇവര്‍ക്കായി അന്വേഷണം തുടരുകയാണ്. മദ്യലഹരിയില്‍ സ്ഥിരമായി പ്രദേശത്ത് പ്രശ്നങ്ങളുണ്ടാക്കുന്ന സംഘത്തിലെ അംഗങ്ങളാണ് യുവാക്കളെന്ന് നാട്ടുകാര്‍ പറയുന്നു. കെഎസ്ഇബിക്കും നാട്ടുകാര്‍ പരാതി നല്‍കിയിട്ടുണ്ട്. പൊലിസ് അന്വേഷണം തുടരുന്നുണ്ട്.