പാലക്കാട്: കോഴി ഫാമിൽ ഉണ്ടായ വൻ തീപിടിത്തത്തിൽ 3000 കോഴിക്കുഞ്ഞുങ്ങൾ ചത്തു. മണ്ണാർക്കാട് കണ്ടമംഗലത്തെ കോഴി ഫാമിലാണ് തീപിടിത്തം ഉണ്ടായത്. ഫൈസൽ എന്നയാളുടെ ഉടമസ്ഥതയിലുള്ളതാണ് കോഴി ഫാം. ഫയർ ഫോഴ്സ് എത്തിയാണ് ഒന്നരമണിക്കൂർ പരിശ്രമത്തിനൊടുവിൽ തീയണച്ചത്.  

ഇന്നലെ രാത്രിയാണ് മുട്ടക്കോഴിക്കുഞ്ഞുങ്ങളെ വളർത്തുന്ന ഫാമിൽ തീപിടിത്തമുണ്ടായത്. ഷോർട്ട് സർക്യൂട്ട് മൂലമാണ് അഗ്നിബാധയുണ്ടായതെന്നാണ് ഫയർഫോഴ്സ് പ്രാഥമിക നിഗമനം. തീപിടിത്തമുണ്ടായത് രാത്രിയിലായതിനാൽ തൊഴിലാളികൾ സ്ഥലത്തുണ്ടായിരുന്നില്ല. കോഴിക്കുഞ്ഞുങ്ങളുടെ കരച്ചിൽ കേട്ടെത്തിയ തൊഴിലാളികൾ ഫയർഫോഴ്‍സിൽ വിവരം അറിയിക്കുകയായിരുന്നു. ഉടൻ ഫയർ ഫോഴ്സ് എത്തിയെങ്കിലും 3000 കോഴിക്കുഞ്ഞുങ്ങൾ അഗ്‌നിക്കിരയാകുകയായിരുന്നു.