കാഠ്മണ്ഡു: നേപ്പാളിനെ പിടിച്ചുകുലുക്കിയ ജെൻ സി പ്രക്ഷോഭത്തിന്റെ പങ്കെടുത്ത മുൻ ചീഫ് ജസ്റ്റിസ് സുശീല കർക്കി (73) ഇടക്കാല പ്രധാനമന്ത്രിയായി നേപ്പാളിനെ നയിക്കാൻ ഒരുങ്ങുന്നതായി റിപ്പോർട്ട്. ജെൻ സി പ്രക്ഷോഭകർ നടത്തിയ നാല് മണിക്കൂർ നീണ്ട വെർച്വൽ യോഗത്തിനൊടുവിൽ, രാഷ്ട്രീയ പാർട്ടികളുമായി ബന്ധമില്ലാത്ത, നിഷ്പക്ഷതയ്ക്കും വിശ്വാസ്യതയ്ക്കും പേര് കേട്ട സുശീല കർക്കിയെ ഇടക്കാല സർക്കാരിന്റെ തലവനായി തെരഞ്ഞെടുത്തതായി റിപ്പോർട്ടുകൾ സൂചിപ്പിക്കുന്നു. പ്രക്ഷോഭത്തിൽ സജീവമായി പങ്കെടുത്ത കർക്കി, യുവാക്കളുടെ വിശ്വാസം ആർജിച്ചാണ് ഈ നിർണായക പദവിയിലേക്ക് ഉയർന്നത്. ആദ്യം കാഠ്മണ്ഡു മേയർ ബാലെന്ദ്ര ഷായെ പരിഗണിച്ചെങ്കിലും, അദ്ദേഹത്തിന്റെ ഭാഗത്തു നിന്ന് പ്രതികരണം ലഭിക്കാത്തതിനെ തുടർന്ന് സുശീലയുടെ പേര് മുന്നോട്ടുവരുകയായിരുന്നു.

സോഷ്യൽ മീഡിയ നിരോധനത്തിനെതിരെ തുടങ്ങിയ ജെൻ സി പ്രക്ഷോഭം, അഴിമതി, സാമ്പത്തിക സ്തംഭനം, തൊഴിലില്ലായ്മ എന്നിവയ്ക്കെതിരായ പ്രതിഷേധമായി വളർന്നു. ഈ പ്രക്ഷോഭത്തിന്റെ മുന്നിൽ മുട്ടുമടക്കി, പ്രധാനമന്ത്രി കെ.പി. ശർമ ഒലി, മന്ത്രിസഭയിലെ മറ്റ് അംഗങ്ങൾ, പ്രസിഡന്റ് രാം ചന്ദ്ര പൗഡെൽ എന്നിവർ രാജിവച്ചു. പുതിയ സർക്കാർ ഔദ്യോഗികമായി നിയമിതമാകുന്നതുവരെ, സുശീല കർക്കി ഇടക്കാല സർക്കാരിനെ നയിക്കുമെന്നാണ് പ്രതീക്ഷിക്കപ്പെടുന്നത്.

ആരാണ് സുശീല കർക്കി?

1952 ജൂൺ 7-ന് നേപ്പാളിലെ ബിരാട്നഗറിൽ ജനിച്ച സുശീല കർക്കി, നിയമരംഗത്തും വാദപ്രവർത്തനത്തിലും അതുല്യമായ മുദ്ര പതിപ്പിച്ച വ്യക്തിത്വമാണ്. 1972-ൽ ബിരാട്നഗറിലെ മഹേന്ദ്ര മൊറാങ് കാമ്പസിൽ നിന്ന് ബി.എ. ബിരുദവും, 1975-ൽ വാരണാസിയിലെ ബനാറസ് ഹിന്ദു യൂണിവേഴ്സിറ്റിയിൽ നിന്ന് രാഷ്ട്രീയ ശാസ്ത്രത്തിൽ എം.എ.യും, 1978-ൽ നേപ്പാളിലെ ത്രിഭുവൻ യൂണിവേഴ്സിറ്റിയിൽ നിന്ന് നിയമ ബിരുദവും (എൽ.എൽ.ബി.) നേടി. 1979-ൽ ബിരാട്നഗറിൽ അഭിഭാഷക വൃത്തി ആരംഭിച്ച സുശീല കർക്കി, 1985-ൽ ധരനിലെ മഹേന്ദ്ര മൾട്ടിപ്പിൾ കാമ്പസിൽ അസിസ്റ്റന്റ് അധ്യാപികയായി ജോലി ചെയ്തു.

2007-ൽ സീനിയർ അഡ്വക്കേറ്റായി മാറിയ കർക്കി, 2009 ജനുവരി 22-ന് സുപ്രീം കോടതിയിൽ താൽക്കാലിക ജസ്റ്റിസായും, 2010 നവംബർ 18-ന് സ്ഥിരം ജഡ്ജിയായും നിയമിതയായി. 2016 ജൂലൈ 11 മുതൽ 2017 ജൂൺ 7 വരെ നേപ്പാളിന്റെ ആദ്യ വനിതാ ചീഫ് ജസ്റ്റിസായി സേവനമനുഷ്ഠിച്ചു. ചീഫ് ജസ്റ്റിസ് എന്ന നിലയിൽ, പരിവർത്തന നീതി, തെരഞ്ഞെടുപ്പ് തർക്കങ്ങൾ, അഴിമതിക്കേസുകൾ എന്നിവയിൽ നിർണായക വിധികൾ പുറപ്പെടുവിച്ചു. നേപ്പാളി സ്ത്രീകൾക്ക് അവരുടെ കുട്ടികൾക്ക് പൗരത്വം കൈമാറാനുള്ള അവകാശം നൽകിയ വിധി, അഴിമതിക്കേസിൽ മന്ത്രിയെ ജയിലിലടച്ച ഉത്തരവ് തുടങ്ങിയവ അവരുടെ ശ്രദ്ധേയമായ തീരുമാനങ്ങളിൽപ്പെടുന്നു.

2017 ഏപ്രിൽ 30-ന് മാവോയിസ്റ്റ് സെന്ററും നേപ്പാളി കോൺഗ്രസും ചേർന്ന് അവർക്കെതിരെ പാർലമെന്റിൽ ഇംപീച്ച്മെന്റ് നോട്ടീസ് സമർപ്പിച്ചെങ്കിലും, ജനകീയ പ്രതിഷേധവും സുപ്രീം കോടതിയുടെ താൽക്കാലിക ഉത്തരവും മൂലം ഈ നീക്കം പിൻവലിക്കപ്പെട്ടു.

നേപ്പാളിന്റെ ആദ്യ വനിതാ പ്രധാനമന്ത്രിയായി ചരിത്രം സൃഷ്ടിക്കാൻ ഒരുങ്ങുന്ന സുശീല കർക്കി, തന്റെ നിഷ്പക്ഷതയും അഴിമതിക്കെതിരായ ശക്തമായ നിലപാടും കൊണ്ട് ജെൻ സി പ്രക്ഷോഭകരുടെ വിശ്വാസം ആർജിച്ചിരിക്കുകയാണ്. "നേപ്പാളിന്റെ വികസനത്തിനായി ഒരുമിച്ച് പ്രവർത്തിക്കും, പുതിയൊരു തുടക്കം സ്ഥാപിക്കാൻ ശ്രമിക്കും," എന്ന് അവർ പ്രതികരിച്ചു.