ഐപിഎല്ലിൽ ഇന്ന് അവസാന ഡബിൾ ഹെഡ്ഡർ. വൈകീട്ട് 3.30 ന് നടക്കുന്ന ആദ്യ കളിയിൽ പഞ്ചാബ് കിങ്സും സൺറൈസേഴ്സ് ഹൈദരാബാദും ഏറ്റുമുട്ടും. ഹൈദരാബാദിന്റെ ഹോം ഗ്രൗണ്ടായ രാജീവ് ഗാന്ധി ഇന്റർനാഷണൽ സ്റ്റേഡിയത്തിലാണ് മത്സരം. പ്ലേ ഓഫ് ഉറപ്പിച്ച ഹൈദരാബാദിന് ആദ്യ രണ്ട് സ്ഥാനത്തെത്താൻ ഇന്നത്തെ വിജയം നിർണായകമാകും. ഇന്ന് ജയിക്കുകയും അവസാന മത്സരത്തിൽ രാജസ്ഥാൻ തോൽക്കുകയും ചെയ്താൽ സൺറൈസേഴ്സിന് ക്വാളിഫയർ 1ൽ മത്സരിക്കാം.

അതുകൊണ്ടുതന്നെ ഇന്നത്തെ മത്സരത്തിൽ പഞ്ചാബിനെ തകർത്ത് പ്ലേഓഫിലേക്കുള്ള ആത്മവിശ്വാസം നേടാൻ കൂടിയാണ് ഹൈദരാബാദ് ഇറങ്ങുന്നത്. മറുവശത്ത് പോയിൻ്റ് പട്ടികയിൽ ഒൻപതാം സ്ഥാനത്താണ് പഞ്ചാബ്. തീർത്തും നിരാശപ്പെടുത്തുന്ന സീസൺ ആണ് അവർക്ക് കടന്നുപോയത്. എങ്കിലും കഴിഞ്ഞ മത്സരത്തിൽ അവർ വിജയിച്ചിരുന്നു. ഇന്നത്തെ മത്സരവും വിജയിച്ച് അഭിമാനത്തോടെ ടൂർണ്ണമെന്റിൽ നിന്ന് മടങ്ങാനാണവർ ആഗ്രഹിക്കുന്നത്. 

ഇന്നു നടക്കുന്ന രണ്ടാമത്തെയും പ്ലേഓഫിനു മുൻപുള്ള ലീഗിലെ അവസാനത്തെയും മത്സരത്തിൽ രാജസ്ഥാൻ റോയൽസ് കൊൽക്കത്ത നൈറ്റ് റൈഡേഴ്സിനെ നേരിടും. ഗുവാഹത്തിയിൽ രാത്രി 7.30 നാണ് മത്സരം. ടൂർണമെന്റിന്റെ ആദ്യഘട്ടത്തിൽ തുടർ വിജയങ്ങളായിരുന്നു രാജസ്ഥാന്. എന്നാൽ അവസാന മത്സരങ്ങളിൽ അവർ തികച്ചും കളി മറന്ന അവസ്ഥയിലാണ്. ജോസ് ബട്ട്ലറുടെ മടക്കം രാജസ്ഥാന്റെ ടീം ബാലൻസിങിനെ നന്നായി ബാധിച്ചിട്ടുണ്ട്.

ഇന്നവർക്ക് നേരിടാനുള്ളത് ടൂർണമെൻ്റിലെ ഒന്നാം സ്ഥാനക്കാരെ ആണെന്നുള്ളത് തീർത്തും വെല്ലുവിളിയാണ്. രാജസ്ഥാൻ ജയിക്കുകയാണെങ്കിൽ ആദ്യ ക്വാളിഫയർ മത്സരത്തിന് മുന്നോടിയായുള്ള ഒരു പരിശീലനമത്സരമായി ഇതിനെ കണക്കാക്കാം. കൊൽക്കത്തയെ തന്നെയാവും അവർക്ക് അവിടെയും നേരിടേണ്ടി വരിക.