ലോക്സഭാ തിരഞ്ഞെടുപ്പ് പ്രചാരണത്തിനിടെ ആള്‍ക്കൂട്ടത്തിന്റെ ആവേശം അതിരുവിട്ടതോടെ പ്രസംഗം ഒഴിവാക്കി വേദി വിട്ട് കോണ്‍ഗ്രസ് നേതാവ് രാഹുല്‍ ഗാന്ധിയും സമാജ്വാദി പാര്‍ട്ടി നേതാവ് അഖിലേഷ് യാദവും. ഉത്തര്‍പ്രദേശിലെ പ്രയാഗ്രാജിലെ ഫുല്‍പൂര്‍ പാര്‍ലമെന്റ് മണ്ഡലത്തിലെ പാഡിലയില്‍ നടന്ന പൊതുയോഗത്തിലാണ് ഗാന്ധിയും യാദവും ജനക്കൂട്ടത്തെ അഭിസംബോധന ചെയ്യാതെ റാലിയില്‍ നിന്ന് വിട്ടുപോയത്.

തിരഞ്ഞെടുപ്പ് പ്രചരണത്തിനെത്തിയ ഇരുനേതാക്കളെയും കാണാനായി വലിയ തിരക്കാണ് അനുഭവപ്പെട്ടത്. നേതാക്കള്‍ എത്തിയതോടെ കോണ്‍ഗ്രസ്, എസ്പി പ്രവര്‍ത്തകര്‍ നിയന്ത്രണം വിട്ട് വേദിയിലേക്ക് കയറാന്‍ ശ്രമിച്ചതായും റിപ്പോര്‍ട്ടുണ്ട്. അഖിലേഷ് യാദവും രാഹുല്‍ ഗാന്ധിയും പാര്‍ട്ടി പ്രവര്‍ത്തകരോട് ശാന്തരാകാന്‍ അഭ്യര്‍ത്ഥിച്ചിരുന്നുവെങ്കിലും അവര്‍ അത് ശ്രദ്ധിച്ചില്ല.

 ആവേശഭരിതരായ ജനക്കൂട്ടത്തെ നിയന്ത്രിക്കാന്‍ പൊലീസും സുരക്ഷാ ഉദ്യോഗസ്ഥരും ബുദ്ധിമുട്ടി. ഇതോടെ രാഹുല്‍ ഗാന്ധിയും അഖിലേഷും വേദിയില്‍വച്ച് പരസ്പരം കൂടിയാലോചിച്ച് വലിയ അപകടത്തിലേക്കു പോകാതിരിക്കാന്‍ വേദി വിടുകയായിരുന്നു.

ഇരുവരും പിന്നീട്  അലഹാബാദ് ലോക്‌സഭാ മണ്ഡലത്തില്‍ ഉള്‍പ്പെടുന്ന കരച്ചനയില്‍ സംഘടിപ്പിച്ച തിരഞ്ഞെടുപ്പ് പ്രചാരണ യോഗത്തില്‍ പങ്കെടുത്തു. അവിടെയും പ്രവര്‍ത്തകരുടെ ആവേശം പലപ്പോലും അതിരുവിട്ടെങ്കിലും, സുരക്ഷാ ഉദ്യോഗസ്ഥര്‍ സ്ഥിതിഗതികള്‍ കൈവിട്ടു പോകാതിരിക്കാന്‍ ശ്രദ്ധിച്ചു.

രാഹുല്‍ ഗാന്ധി മത്സരിക്കുന്ന റായ്ബറേലിയും കേന്ദ്രമന്ത്രി സ്മൃതി ഇറാനി മത്സരിക്കുന്ന അമേഠിയും ഉള്‍പ്പെടെയുള്ള മണ്ഡലങ്ങള്‍ അഞ്ചാം ഘട്ട വോട്ടെടുപ്പു നടക്കുന്ന നാളെ പോളിങ് ബൂത്തിലെത്തും.