ഗാസയില്‍ ഇസ്‌റാഈല്‍ നടത്തുന്ന അതിക്രമങ്ങള്‍ മാസങ്ങള്‍ പിന്നിട്ടിട്ടും അധിനിവേശ രാഷ്ട്രത്തിന്റെ ലക്ഷ്യങ്ങളൊന്നും സഫലമാകാത്തതിനാല്‍ ഇസ്‌റാഈല്‍ മന്ത്രിസഭയില്‍ തമ്മിലടി തുടരുന്നു.ഇനിയും അന്ത്യമില്ലാതെ തുടരുന്ന അവസ്ഥ അനുവദിച്ചുകൂടെന്നു പറഞ്ഞ് യുദ്ധ കാബിനറ്റ് അംഗം കൂടിയായ ബെന്നി ബാന്റ്സ് ഭീഷണി മുഴക്കിയതിനു പിന്നാലെ സുരക്ഷാ മന്ത്രിയും തീവ്ര വലതുപക്ഷ നേതാവുമായ ബെന്‍ ഗിവിറും നെതന്യാഹുവിനെതിരെ രംഗത്തെത്തിയിരിക്കുകയാണ്. 

യുദ്ധ കാബിനറ്റ് പിരിച്ചുവിട്ട് അംഗങ്ങളായ ബെന്നി ഗാന്റ്സ്, ഗാഡി ഐസന്‍കോട്ട്, പ്രതിരോധ മന്ത്രി യോവ് ഗാലന്റ് എന്നിവരെ പുറത്താക്കാന്‍ നെതന്യാഹു ധൈര്യം കാണിക്കണമെന്നാണിപ്പോള്‍ ബെന്‍ ഗിവിര്‍ ആവശ്യപ്പെട്ടിരിക്കുന്നത്. കഴിഞ്ഞ ദിവസം നടന്ന മന്ത്രിസഭാ യോഗത്തില്‍ ഗിവിറും നെതന്യാഹുവും തമ്മില്‍ ഏറ്റുമുട്ടിയെന്നും വാര്‍ത്തകള്‍ പുറത്തുവരുന്നുണ്ട്.

ഇന്നലെ മന്ത്രിസഭാ യോഗത്തില്‍ ബെന്‍ ഗിവിര്‍ സംസാരിക്കുന്നതിനിടെ പ്രതിരോധ മന്ത്രി ഗാലന്റ് ഇറങ്ങിപ്പോയതാണ് ഏറ്റവും പുതിയ പ്രകോപനം. ഗാലന്റിനെ പിരിച്ചുവിടാന്‍ നെതന്യാഹു തയാറാകണമെന്ന് സുരക്ഷാ മന്ത്രി ആവശ്യപ്പെട്ടു. താന്‍ എപ്പോള്‍ സംസാരിക്കാന്‍ എണീറ്റാലും ഇറങ്ങിപ്പോകുന്നത് ഗാലന്റിന്റെ സ്ഥിരം പരിപാടിയാണെന്നും അദ്ദേഹം ആരോപിച്ചു. തുടര്‍ന്നായിരുന്നു നെതന്യാഹുവുമായി ശക്തമായ വാക്പോര് നടന്നതെന്ന് ഇസ്രായേല്‍ ചാനലായ 'കാന്‍' റിപ്പോര്‍ട്ട് ചെയ്തു.