നരേന്ദ്രമോദി തന്റെ മാതാപിതാക്കളെ അനാവശ്യമായ പ്രശ്‌നങ്ങളിലേക്ക് വലിച്ചിഴക്കുന്നെന്ന് ആരോപിച്ച് ഡല്‍ഹി മുഖ്യമന്ത്രി അരവിന്ദ് കേജ്‌രിവാള്‍.സ്വാതി മലിവാള്‍ കേസില്‍ തന്റെ മാതാപിതാക്കളെ ചോദ്യം ചെയ്യാന്‍ ഡല്‍ഹി പൊലീസ് തീരുമാനിച്ചതിലാണ് കേജ്‌രിവാളിന്റെ പ്രതികരണം.പോരാട്ടം നമ്മള്‍ തമ്മിലാണെന്നും അതിലേക്ക് തന്റെ മാതാപിതാക്കളെ വലിച്ചിഴയ്ക്കരുതെന്നുമായിരുന്നു കേജ്‌രിവാളിന്റെ പ്രതികരണം.

തന്നേയും പാര്‍ട്ടിയെയും തകര്‍ക്കാന്‍ ശ്രമിച്ചു. ഇപ്പോഴിതാ തന്റെ മാതാപിതാക്കളെ വേട്ടയാടുന്നു. പ്രധാനമന്ത്രി എല്ലാ അതിര്‍വരമ്പുകളും ലംഘിച്ചു. തന്റെ മാതാപിതാക്കള്‍ കുറ്റകൃത്യത്തില്‍ പങ്കാളികളാണോ? നമ്മള്‍ തമ്മിലാണ് പോരാട്ടം. അതിലേക്ക് എന്തിനാണ് മാതാപിതാക്കളെ വലിച്ചിഴയ്ക്കുന്നത് എന്നായിരുന്നു കെജ്‌രിവാളിന്റെ ചോദ്യം.

ആം ആദ്മി രാജ്യസഭാംഗം സ്വാതി മലിവാളിനെ കെജ്രിവാളിന്റെ പിഎ ബിഭവ് കുമാര്‍ മര്‍ദ്ദിച്ചെന്ന കേസില്‍ ഡല്‍ഹി മുഖ്യമന്ത്രി അരവിന്ദ് കെജ്രിവാളിന്റെ മാതാപിതാക്കളെ ചോദ്യം ചെയ്യാനാണ് ഡല്‍ഹി പൊലീസിന്‌ഫെ തീരുമാനം. പരാതിക്കാസ്പദമായ സംഭവം നടക്കുമ്പോള്‍ അവിടെയുണ്ടായിരുന്ന എല്ലാവരെയും ചോദ്യം ചെയ്യുക എന്ന സ്വാഭാവിക നടപടിയാണ് ഇതെന്നാണ് ഡല്‍ഹി പൊലീസ് പറയുന്നത്. ചോദ്യം ചെയ്യാനുള്ള തീയതി ഇത് വരെ തീരുമാനിച്ചിട്ടില്ല.

ഡല്‍ഹി പൊലീസിന്റെ നീക്കം രാഷ്ട്രീയ ആയുധമാക്കി മാറ്റാനാണ് എഎപിയുടെ തീരുമാനം. 85 വയസ്സിന് മുകളില്‍ പ്രായമായ മാതാപിതാക്കളെ ചോദ്യം ചെയ്യുന്നതിനായി പ്രധാനമന്ത്രി നരേന്ദ്ര മോദി ഇടപെട്ടുവെന്ന് എഎപി ആരോപിക്കുന്നു. തന്റെ അസുഖബാധിതരായ മാതാപിതാക്കളെ ചോദ്യം ചെയ്യാനായി ഡല്‍ഹി പൊലീസ് എത്തിയേക്കുമെന്ന് കഴിഞ്ഞദിവസം കെജ്രിവാള്‍ പറഞ്ഞിരുന്നു. ഭാര്യ സുനിത കെജ്രിവാളിനേയും ചോദ്യം ചെയ്തേക്കുമെന്നും സൂചനയുണ്ട്. മാതാപിതാക്കളുടേയും സുനിതയുടേയും മൊഴി രേഖപ്പെടുത്താന്‍ പൊലീസ് നേരത്തെ സമയം ചോദിച്ചിരുന്നതായും എഎപി വൃത്തങ്ങള്‍ സൂചന നല്‍കുന്നു.