പേരാമ്പ്ര: വെസ്റ്റ്  എ.യു.പി സ്‌ക്കൂളില്‍ സ്‌കൂളില്‍ സാമൂഹ്യ വിരുദ്ധരുടെ ശല്യം. സ്‌കൂള്‍ മതില്‍ ചാടി കടന്ന് ക്ലാസ് മുറികളില്‍  പതിച്ച ചുമര്‍  പത്രികകള്‍ ക്ലാസ് റൂം ലൈബ്രറിയുടെ ഭാഗമായി പ്രദര്‍ശിപ്പിച്ച ബാലമാസികകള്‍, പത്ര കട്ടിങ്ങുകള്‍,  കൊളാഷ്, തുടങ്ങിയവ മുഴുവനായും നശിപ്പിച്ചു.  രാവിലെ സ്‌കൂളിലെത്തിയപ്പോഴാണ് അതിക്രമങ്ങള്‍  അധ്യാപകരുടെ ശ്രദ്ധയില്‍ പെട്ടത്.  സ്റ്റാഫ് റൂം തള്ളി തുറന്ന്  ഡിക്ഷനറി, കുട്ടികളുടെ സെമിനാര്‍, പ്രൊജക്ട്  ബുക്കുകള്‍ വലിച്ച് കീറിയ നിലയില്‍ കണ്ടെത്തി. തയ്യല്‍ മെഷിന്‍ നിലത്തിട്ട് പൊട്ടിക്കുകയും ബെഞ്ച്, ഡസ്‌ക്  തല്ലിതകര്‍ക്കുകയും ചെയ്തു. ഹെഡ്മിസ്ട്രസ് നല്‍കിയ പരാതിയില്‍ പെരുവണ്ണാമൂഴി പൊലിസ്  അന്വേഷണം ആരംഭിച്ചു. രാത്രികാലങ്ങളില്‍ സ്‌കൂള്‍ പരിസര പ്രദേശങ്ങള്‍ മദ്യപാനികളുടെയും  സാമൂഹ്യ വിരുദ്ധരുടെയും സങ്കേതമാണെന്ന് പരക്കെ പരാതിയുണ്ട്.  അതിക്രമിച്ചു കയറിയ  സാമൂഹ്യ വിരുദ്ധര്‍ക്കെതിരേ കര്‍ശന നടപടിയെടുക്കണമെന്ന്  പി.ടി.എ ആവശ്യപ്പെട്ടു. പ്രസിഡന്റ് ദിനേശന്‍ കാപ്പുങ്കര, ഹെഡ്മിസ്ട്രസ് പി.പി ശാന്ത സംസാരിച്ചു.