കൊച്ചി: ശ്രീശങ്കരാചാര്യ സംസ്‌കൃത സര്‍വകലാശാലയുടെ കാലടി മുഖ്യ ക്യാംപസില്‍ 2024-25 അധ്യയന വര്‍ഷത്തെ വിവിധ നാല് വര്‍ഷ ബിരുദ, ബി.എഫ്.എ കോഴ്സുകളിലേയ്ക്ക് അപേക്ഷ ക്ഷണിച്ചു. സംസ്‌കൃതം സാഹിത്യം, സംസ്‌കൃതം വേദാന്തം, സംസ്‌കൃതം വ്യാകരണം, സംസ്‌കൃതം ന്യായം, സംസ്‌കൃതം ജനറല്‍, ഇംഗ്ലിഷ്, മലയാളം, ഹിന്ദി, ഹിസ്റ്ററി, ഫിലോസഫി, സോഷ്യല്‍ വര്‍ക്ക് (ബി.എസ്.ഡബ്ല്യു), സംഗീതം, ഡാന്‍സ്  ഭരതനാട്യം, ഡാന്‍സ്  മോഹിനിയാട്ടം എന്നിവയാണ് നാലുവര്‍ഷ ബിരുദ സമ്പ്രദായത്തില്‍ സര്‍വകലാശാലയുടെ കാലടി മുഖ്യ ക്യാംപസില്‍ നടത്തുന്ന ബിരുദ പ്രോഗ്രാമുകള്‍. 

നാലുവര്‍ഷ ബിരുദ സമ്പ്രദായത്തില്‍ മൂന്ന് വിധത്തില്‍ ബിരുദ പ്രോഗ്രാം പൂര്‍ത്തിയാക്കുവാന്‍ കഴിയും. മൂന്നുവര്‍ഷ ബിരുദം, നാലുവര്‍ഷ ഓണേഴ്സ് ബിരുദം, നാലുവര്‍ഷ ഓണേഴ്സ് വിത്ത് റിസര്‍ച്ച് ബിരുദം എന്നിവയാണവ. പ്രവേശനം ലഭിച്ച് മൂന്നാം വര്‍ഷം പ്രോഗ്രാം പൂര്‍ത്തിയാക്കാന്‍ ആഗ്രഹിക്കുന്നവര്‍ക്ക് എക്സിറ്റ് ഓപ്ഷന്‍ ഉപയോഗപ്പെടുത്തി പഠനം പൂര്‍ത്തിയാക്കി മേജര്‍ വിഷയങ്ങളുടെ അടിസ്ഥാനത്തില്‍ മൂന്ന് വര്‍ഷ ബിരുദം നേടാവുന്നതാണ്. നാലുവര്‍ഷം പഠനം പൂര്‍ത്തിയാക്കുന്നവര്‍ക്ക് നാലുവര്‍ഷ ഓണേഴ്സ് ബിരുദം ലഭിക്കും.  

ഡാന്‍സ്  ഭരതനാട്യം, ഡാന്‍സ്  മോഹിനിയാട്ടം, സംഗീതം എന്നിവ മുഖ്യവിഷയമായ ബിരുദ പ്രോഗ്രാമുകള്‍ക്ക് അഭിരുചി നിര്‍ണയ പരീക്ഷയുടെ കൂടി അടിസ്ഥാനത്തിലായിരിക്കും പ്രവേശനം. നാലുവര്‍ഷ ബിരുദ പ്രോഗ്രാമുകളുടെ പ്രവേശനത്തിനുള്ള ഉയര്‍ന്ന പ്രായപരിധി ജനറല്‍ / എസ്.ഇ.ബി.സി വിദ്യാര്‍ഥികള്‍ക്ക് 2024 ജനുവരി ഒന്നിന് 23 വയസും എസ്.സി / എസ്.ടി വിദ്യാര്‍ഥികള്‍ക്ക് 25 വയസുമാണ്. പ്ലസ്ടു/വൊക്കേഷനല്‍ ഹയര്‍ സെക്കന്‍ഡറി യോഗ്യതയുള്ളവര്‍ക്ക് പ്രോഗ്രാമുകളിലേയ്ക്ക് അപേക്ഷിക്കാവുന്നതാണ്. നാലുവര്‍ഷ ബിരുദ പ്രോഗ്രാമുകള്‍ക്ക് ലാറ്ററല്‍ എന്‍ട്രിയുമുണ്ട്.

ഒരു വിദ്യാര്‍ഥിക്ക് ഒന്നിലധികം ബിരുദ പ്രോഗ്രാമുകളിലേയ്ക്ക് അപേക്ഷിക്കാന്‍ കഴിയും. അപേക്ഷ ഫീസ് ജനറല്‍ / എസ്.ഇ.ബി.സി വിദ്യാര്‍ഥികള്‍ക്ക് ഓരോ പ്രോഗ്രാമിനും 50 രൂപയും എസ്.സി / എസ്.ടി വിദ്യാര്‍ഥികള്‍ക്ക് ഓരോ പ്രോഗ്രാമിനും 25 രൂപയുമാണ്. 

ഫൈന്‍ ആര്‍ട്സില്‍ ബിരുദപഠനം 
ബാച്ചിലര്‍ ഓഫ് ഫൈന്‍ ആര്‍ട്സ് (ബി.എഫ്.എ) പ്രോഗ്രാമിന്റെ കാലാവധി നാലുവര്‍ഷമാണ്. പെയിന്റിങ്, മ്യൂറല്‍ പെയിന്റിങ്, സ്‌കള്‍പ്ചര്‍ എന്നിവയാണ് സ്പെഷ്യലൈസേഷനുകള്‍.  പ്ലസ്ടു / വൊക്കേഷനല്‍ ഹയര്‍ സെക്കന്‍ഡറി അഥവ തത്തുല്യ യോഗ്യതയുള്ളവര്‍ക്ക് അപേക്ഷിക്കാം. ചോയ്സ് ബേസ്ഡ് ക്രെഡിറ്റ് ആന്‍ഡ് സെമസ്റ്റര്‍ സമ്പ്രദായത്തില്‍ നടത്തുന്ന ബി. എഫ്.എ പ്രോഗ്രാമുകള്‍ക്ക് അപേക്ഷിക്കാനുള്ള പ്രായം 2024 ജൂണ്‍ ഒന്നിനു  22 വയസാണ്. അഭിരുചി നിര്‍ണയ പരീക്ഷയുടെ അടിസ്ഥാനത്തിലായിരിക്കും പ്രവേശനം. 

സംസ്‌കൃത പഠനത്തിന് 1000 രൂപ സ്‌കോളര്‍ഷിപ്പ് 
സംസ്‌കൃത വിഷയങ്ങളില്‍ ബിരുദ പഠനത്തിന് (മേജര്‍) പ്രവേശനം നേടുന്ന മുഴുവന്‍ വിദ്യാര്‍ഥികള്‍ക്കും ആദ്യ രണ്ട് വര്‍ഷങ്ങളില്‍ പ്രതിമാസം 500 രൂപ വീതവും മൂന്നും നാലും വര്‍ഷങ്ങളില്‍ പ്രതിമാസം 1000 രൂപ വീതവും സര്‍വകലാശാല സ്‌കോളര്‍ഷിപ്പ് നല്‍കും.  അപേക്ഷകള്‍  https://ugadmission.ssus.ac.in വഴി ഓണ്‍ലൈനായി സമര്‍പ്പിക്കാം. അവസാന തീയതി ജൂണ്‍ ഏഴ്. വിവരങ്ങള്‍ക്ക് www.ssus.ac.in.

വിദ്യാഭ്യാസ വാര്‍ത്തകള്‍ക്ക് ഗ്രൂപ്പില്‍ ജോയിന്‍ ചെയ്യുക