കൊച്ചി: പെരിയാറിലെ മത്സ്യക്കുരുതിയില്‍ ജലസേചന വകുപ്പിനെതിരെ ഹൈക്കോടതിയില്‍ സത്യവാങ്മൂലം സമര്‍പ്പിച്ച് മലിനീകരണ നിയന്ത്രണ ബോര്‍ഡ്. പാതാളം ബണ്ട് ദീര്‍ഘകാലം അടച്ചിടുന്നത് ജൈവമാലിന്യം അടിഞ്ഞ് കൂടുന്നതിന് കാരണമാകുമെന്ന് ബോര്‍ഡ് കോടതിയിലെ അറിയിച്ചു. 

മാത്രമല്ല പെരിയാറിലെ ഒഴുക്ക് കുറഞ്ഞ നിലക്കെങ്കിലും നിലനിര്‍ത്തണമെന്ന് ജലസേചന വകുപ്പിന് നിര്‍ദേശം നല്‍കിയിരുന്നെങ്കിലും അവ നടപ്പാക്കിയില്ലെന്നും മലിനീകരണ നിയന്ത്രണ ബോര്‍ഡ് സത്യവാങ്മൂലത്തില്‍ വ്യക്തമാക്കി. 2017 ലെ ദേശീയ ഹരിത ട്രൈബ്യൂണലിന്റെ നിര്‍ദേശപ്രകാരമാണ് നിര്‍ദേശം നല്‍കിയിരുന്നതെന്നും ബോര്‍ഡ് കോടതിയെ അറിയിച്ചു. മത്സ്യക്കുരുതിയുടെ കാരണം വിശദമാക്കുന്ന സത്യവാങ്മൂലത്തിലാണ് ജലസേചന വകുപ്പിനെതിരായ മലിനീകരണ നിയന്ത്രണ ബോര്‍ഡിന്റെ ഗുരുതര ആരോപണങ്ങള്‍.

പെരിയാറില്‍ രാസമാലിന്യം ഒഴുക്കിയതിനെ തുടര്‍ന്ന് മത്സ്യങ്ങള്‍ കൂട്ടത്തോടെ ചത്തുപൊങ്ങിയ സംഭവത്തില്‍ കോടികളുടെ നഷ്ടമാണ് മത്സ്യക്കര്‍ഷകര്‍ക്കുണ്ടായത്. വാരാപ്പുഴ, ചേരാനെല്ലൂര്‍, കടമക്കുടി എന്നീ പഞ്ചായത്തുകളിലാണ് ഏറ്റവും കൂടുതല്‍ നഷ്ടമുണ്ടായത്. കൊച്ചി കോര്‍പ്പറേഷന്‍ മേഖലയിലേക്കും വിഷപ്പുഴ ഒഴുകിയെന്നാണ് ഫിഷറീസ് വകുപ്പ് റിപ്പോര്‍ട്ടില്‍ പറയുന്നത്.