ഒരു ദശാബ്ദത്തിന് ശേഷം ഗുജറാത്തില്‍ ലോക്‌സഭാ തിരഞ്ഞെടുപ്പില്‍ കോണ്‍ഗ്രസ് വീണ്ടും അക്കൗണ്ട് തുറന്നു. ഗുജറാത്തിലെ ബനസ്‌കന്ത സീറ്റില്‍ നിന്നാണ് കോണ്‍ഗ്രസ് നീണ്ട ഇടവേളയ്ക്ക് ശേഷം വിജയിച്ച് കയറിയത്. ജെനിബെന്‍ താക്കൂര്‍ ആയിരുന്നു ഇവിടെ കോണ്‍ഗ്രസിന്റെ ലോക്‌സഭാ സ്ഥാനാര്‍ത്ഥി. 30,000-ത്തിലധികം വോട്ടുകളുടെ ഭൂരിപക്ഷത്തിലാണ് ബിജെപിയുടെ രേഖ ചൗധരിയെ ജെനിബെന്‍ താക്കൂര്‍ പരാജയപ്പെടുത്തിയത്. ഇതോടെ 2014 ലും 2019 ലും 26 സീറ്റിലും വിജയിച്ച് ക്ളീന്‍ ഷീറ്റ് നേടിയ ബിജെപിക്ക് ഇത്തവണ അത് തുടരാനായില്ല.

ബിജെപിയുടെ പരമ്പരാഗത കോട്ടയായിരുന്നു ബനസ്‌കന്ത മണ്ഡലം. 2014ല്‍ ബിജെപിയുടെ ഹരിഭായ് ചൗധരി രണ്ടേകാല്‍ ലക്ഷം വോട്ടുകളെ ഭൂരിപക്ഷത്തിനാണ് വിജയിച്ചിരുന്നത്. 2014-ല്‍ 2.26 ലക്ഷമായിരുന്ന വിജയമാര്‍ജിന്‍ 2019-ല്‍ 3.55 ലക്ഷമായി ഉയര്‍ന്നു. പര്‍ബത്ഭായ് പട്ടേല്‍ ആയിരുന്നു 2019 ല്‍ ബിജെപിയുടെ സ്ഥാനാര്‍ത്ഥി. പ്രധാനമന്ത്രി നരേന്ദ്ര മോദിയുടെയും ആഭ്യന്തര മന്ത്രി അമിത് ഷായുടെയും സ്വന്തം സംസ്ഥാനമായ ഗുജറാത്ത് രാജ്യത്തെ ബിജെപിയുടെ ശക്തമായ കോട്ടയാണ്. 1995 മുതല്‍ ബിജെപി സര്‍ക്കാരാണ് ഇവിടെ അധികാരത്തിലുള്ളത്.