കൊച്ചി: വിദേശ യാത്രയ്ക്ക് പോകുമ്പോൾ വളർത്തു മൃഗങ്ങളെ കൊണ്ടുപോകാൻ സാധിക്കാത്തത് പലരുടെയും വലിയ പ്രശ്നമാണ്. കേരളത്തിലെ വിമാനത്താവളങ്ങളിൽ ഈ സൗകര്യം ഇല്ലാത്തത് പലർക്കും തിരിച്ചടിയായിരുന്നു. എന്നാല്‍ ഇനി മുതല്‍ കൊച്ചി അന്താരാഷ്ട്ര വിമാനത്താവളത്തില്‍ (സിയാല്‍) നിന്നും വളര്‍ത്തുമൃഗങ്ങളെ യാത്രയിൽ കൂടെക്കൂട്ടാനുള്ള സൗകര്യവും ഉണ്ടാകും. നേരത്തെ ചെന്നൈ വിമാനത്താവളം വഴിയാണ് കേരളത്തിൽ ഉള്ളവർ വളർത്തു മൃഗങ്ങളെ കൊണ്ടുപോയിരുന്നത്.   

വളര്‍ത്തുമൃഗങ്ങളെ വിദേശത്തേക്ക് കൊണ്ടുപോകാനുള്ള 'പെറ്റ് എക്‌സ്‌പോര്‍ട്ട്' അനുമതിയാണ് കൊച്ചിക്ക് ലഭിച്ചത്. കേരളത്തിലെ ഇത്തരത്തിലുള്ള ആദ്യ വിമാനത്താവളമാണ് കൊച്ചി. ഈ സേവനം ഉപയോഗിച്ചുള്ള ആദ്യ വളർത്തു മൃഗത്തെ ഖത്തര്‍ എയര്‍വേഴ്‌സിന്റെ വിമാനത്തില്‍ ദോഹ വഴി ദുബൈയിലേക്ക് കൊണ്ടുപോയി. ലാസ അപ്സോ ഇനത്തില്‍പ്പെട്ട 'ലൂക്ക' എന്ന നായ്ക്കുട്ടിയാണ് ആദ്യമായി കൊച്ചിയില്‍ നിന്നും വിമാനത്തില്‍ പറന്നത്. 

വളര്‍ത്തുമൃഗങ്ങള്‍ക്കായി വിപുലമായ സൗകര്യമാണ് കൊച്ചി വിമാനത്താവളത്തിൽ ഒരുക്കിയിരിക്കുന്നത്. 24 മണിക്കൂറും പ്രവര്‍ത്തിക്കുന്ന ശീതീകരിച്ച പെറ്റ് സ്റ്റേഷന്‍,  വെറ്ററിനറി ഡോക്ടര്‍മാര്‍, മൃഗങ്ങളെ കൊണ്ടു വരുന്നവര്‍ക്കുള്ള ഫെസിലിറ്റേഷന്‍ സെന്റര്‍, പ്രത്യേക കാര്‍ഗോ വിഭാഗം, കസ്റ്റംസ് ക്ലിയറന്‍സ് കേന്ദ്രം തുടങ്ങിയ സേവനങ്ങളാണ് ഒരുക്കിയിരിക്കുന്നത്. 

ഇതുവരെ ആഭ്യന്തര റൂട്ടുകളില്‍ മൃഗങ്ങളെ കൊണ്ടുപോകാനും വരാനുമുള്ള അനുമതിയേ കൊച്ചിക്ക് ഉണ്ടായിരുന്നുള്ളൂ. ഇപ്പോള്‍ എല്ലാ വിദേശ രാജ്യങ്ങളിലേക്കും കൊണ്ടുപോകാനുള്ള അനുമതിയായി. പക്ഷെ വിദേശത്ത് നിന്ന് മൃഗങ്ങളെ നേരിട്ട് ഇറക്കുമതി ചെയ്യാനുള്ള അനുമതി ലഭിച്ചിട്ടില്ല. ഇതിന് വേണ്ടി പ്രത്യേക സൗകര്യം ഒരുക്കേണ്ടതായിട്ടുണ്ട്. ഇതിനുള്ള ശ്രമങ്ങൾ പുരോഗമിച്ച് വരികയാണ്.