പുതുച്ചേരി: പുതുച്ചേരിയില്‍ മാന്‍ഹോളലൂടെ വീടിനുള്ളിലേക്ക് കയറിയ വിഷവായു ശ്വസിച്ച് മൂന്നു പേര്‍ക്ക് ദാരുണാന്ത്യം. 15 വയസുള്ള ഒരു കുട്ടിയും രണ്ട് സ്ത്രീകളുമാണ് മരിച്ചത്. റെഡ്ഡിപാളയം മേഖലയിലാണ് ദാരുണമായ അപകടമുണ്ടായത്. പ്രദേശത്തെ വീടുകള്‍ എല്ലാം ഒഴിപ്പിച്ചു. മാന്‍ഹോളിലൂടെ പുറത്തു വന്ന വിഷവായു ശുചിമുറിയിലൂടെയാണ് വീടിനുള്ളിലേക്ക് എത്തുന്നത്. 

വിഷ വായു ശ്വസിച്ച വീട്ടിലെ സ്ത്രീകള്‍ നിലവിളിക്കുന്നുണ്ടായിരുന്നു. ഈ ശബ്ദം കേട്ട് വീട്ടിലേക്ക് ഓടിയെത്തിയ 15 വയസുള്ള കുട്ടിയും വിഷപുക ശ്വസിച്ച് മരിക്കുകയായിരുന്നു. രണ്ടുപേര്‍ ഗുരുതരാവസ്ഥയില്‍ ചികിത്സയിലുമാണ്. റെഡ്ഡിപാളയം, പുതുനഗര്‍ മേഖലയിലെ മുഴുവന്‍ മാന്‍ഹോളുകളും തുറന്നിട്ടതിനാല്‍ പ്രദേശത്ത് കനത്ത ജാഗ്രതയാണ് പ്രഖ്യാപിച്ചിരിക്കുന്നത്.