ന്യൂഡല്‍ഹി: മൂന്നാം നരേന്ദ്രമോദി സര്‍ക്കാറിലെ മന്ത്രിമാരില്‍ 39 ശതമാനം ക്രിമിനല്‍ക്കേസ് പ്രതികള്‍. 71 മന്ത്രിമാരില്‍ 28 പേരാണ് ക്രിമിനല്‍ക്കേസ് പ്രതികളായിട്ടുള്ളത്. വധശ്രമം, തട്ടിക്കൊണ്ടുപോകല്‍, സ്ത്രീകള്‍ക്കെതിരായ കുറ്റകൃത്യങ്ങള്‍ തുടങ്ങിയ ഗുരുതരമായ ക്രിമിനല്‍ കുറ്റങ്ങളുള്ള 19 മന്ത്രിമാരും (27 ശതമാനം) ഇതില്‍ ഉള്‍പ്പെടുന്നു.
തുറമുഖം, ഷിപ്പിങ്, ജലപാത സഹമന്ത്രി ശാന്തനു താക്കൂര്‍, വിദ്യാഭ്യാസ, വടക്കു കിഴക്കന്‍ മേഖല വികസന സഹമന്ത്രി സുകാന്ത മജുംദാര്‍ എന്നിവര്‍ക്കെതിരേ ഇന്ത്യന്‍ ശിക്ഷാനിയമത്തിലെ 307ാം വകുപ്പ് പ്രകാരം വധശ്രമവുമായി ബന്ധപ്പെട്ട കേസുകളുണ്ട്.

അഞ്ചു മന്ത്രിമാര്‍ സ്ത്രീകള്‍ക്കെതിരായ കുറ്റകൃത്യങ്ങളുമായി ബന്ധപ്പെട്ട കേസുകളില്‍ പ്രതികളാണ്. പുതിയ മന്ത്രിസഭയില്‍ കൂടുതലും സമ്പന്നരാണ്. 71 മന്ത്രിമാരില്‍ 70 പേരും (99 ശതമാനം) കോടിശ്വരന്‍മാരാണ്. 107.94 കോടിയാണ് ഈ മന്ത്രിമാരുടെ ശരാശരി ആസ്തി. ആറ് മന്ത്രിമാര്‍ 100 കോടി രൂപയില്‍ കൂടുതല്‍ ആസ്തിയുള്ളവരാണ്.