ഗസ്സ: മാസങ്ങളായി തുടരുന്ന ഇസ്‌റാഈൽ സൈന്യത്തിന്റെ ക്രൂരതയുടെ ബാക്കിപത്രങ്ങളായി ഗസ്സ സിറ്റിയിൽ മൃതദേഹങ്ങൾ ചിന്നിച്ചിതറി കിടക്കുന്നു. 60 മൃതദേഹങ്ങളാണ് കണ്ടെത്തിയതെന്ന് ഗസ്സ സിവിൽ എമർജൻസി സർവിസ് അറിയിച്ചു. ആഴ്ചകൾ നീണ്ട കനത്ത ആക്രമണത്തിന് ശേഷം ഗസ്സയിലെ വിവിധ ജില്ലകളിൽ നിന്ന് ഇസ്‌റാഈൽ സൈന്യം പിന്മാറിയതിന് പിന്നാലെയാണ് മൃതദേഹങ്ങൾ കണ്ടെടുത്തത്. തെൽ അൽ ഹവ, സബ്ര മേഖലകളിൽ നിന്നാണ് സൈന്യം പിൻവാങ്ങിയത്. 

തെൽ അ​ൽ ഹ​വ​യി​ൽ ​നി​ന്ന് വെ​ള്ളി​യാ​ഴ്ച രാ​വി​ലെ​യാ​ണ് ഇസ്‌റാഈൽ സേ​ന പി​ന്മാ​റി​യ​ത്. സൈന്യം പിന്മാറിയ പ്രദേശങ്ങളിൽ നടത്തിയ പരിശോധനയിലാണ് നിരവധി മൃതദേഹങ്ങൾ കണ്ടെത്തിയത്. മൃതദേഹങ്ങൾ തെരുവിൽ ചിതറിയ നിലയിലായിരുന്നുവെന്ന് ദൃക്‌സാക്ഷികൾ പറഞ്ഞു. ഒരു കുടുംബത്തിലെ മൂന്നു പേരുടെ മൃതദേഹങ്ങളും ഇതിൽ ഉൾപ്പെടും. ഒരു കുടുംബത്തിലെ അംഗങ്ങളുടെ മൃതദേഹങ്ങൾ പൂർണമായും കത്തിക്കരിഞ്ഞ നിലയിലായിരുന്നുവെന്നും ഗസ്സ സിവിൽ ഡിഫൻസ് വക്താവ് മഹ്മൂദ് ബാസൽ പറഞ്ഞു.

വ്യോ​മാ​ക്ര​മ​ണ​ത്തി​ൽ ​കൊ​ല്ല​പ്പെ​ട്ട ഒ​രു കു​ടും​ബ​ത്തി​ലെ അം​ഗ​ങ്ങ​ളു​ടേ​തു​ൾ​പ്പെ​ടെയുള്ള 60 മൃ​ത​ദേ​ഹ​ങ്ങ​ളാ​ണ് ക​ണ്ടെ​ടുത്തത്. എന്നാൽ മൃതദേഹങ്ങളുടെ എണ്ണം 70 കടന്നെന്നും റിപ്പോർട്ടുകളുണ്ട്. സൈന്യം തമ്പടിച്ചിരുന്നതിനാൽ ഇത്രയും ദിവസം അനാഥമായി കിടന്നിരുന്ന മൃതദേഹങ്ങളാണ് കണ്ടെടുക്കുന്നത്. ഗസ്സ സിറ്റിയെ കോൺക്രീറ്റ് കൂനയാക്കി മാറ്റിയതിനാൽ ഈ കോൺക്രീറ്റ് അവശിഷ്ടങ്ങൾക്ക് ഇടയിലും നിരവധിപ്പേർ കിടപ്പുണ്ടാകാമെന്നാണ് കണക്കുകൂട്ടൽ. 

സൈന്യം പിന്മാറാത്ത ഇടങ്ങളിലെ മൃ​ത​ദേ​ഹ​ങ്ങ​ൾ മാ​റ്റാ​നും പ​രി​ക്കേ​റ്റ​വ​രെ ആ​ശു​പ​ത്രി​യി​ലെ​ത്തി​ക്കാ​നു​മു​ള്ള ശ്ര​മ​ങ്ങ​ൾ പോലും സൈന്യം തടയുകയാണ്. ഷു​ജ​യ്യ​യിൽ നിന്നും നിരവധി മൃതദേഹങ്ങൾ​ കണ്ടെത്തിയതായാണ് വിവരം​.

അതേസമയം അഭയാർഥികളായി ​താൽക്കാലിക ക്യാ​മ്പു​ക​ളി​ൽ ക​ഴി​യു​ന്ന പ​ല​രും പ​ട്ടി​ണി​യി​ലാ​ണെന്ന്​ ആംനസ്​റ്റി ഇൻറർനാഷനൽ അറിയിച്ചു. ഇസ്‌റാഈൽ സൈന്യം ആക്രമണം നിർത്തിയാലും പട്ടിണി മൂലമുള്ള മരണങ്ങൾ സംഭവിക്കുമോ എന്ന ആശങ്ക തുടരുകയാണ്. ഇതിനിടെ, ഇസ്‌റാഈൽ സൈന്യത്തിലെ ഉന്നംപിഴക്കാത്ത വെടിവയ്പു സംഘവും ടാങ്കുകളും ചില പ്രദേശങ്ങളിൽ ഇപ്പോഴും നിലയുറപ്പിച്ചിട്ടുണ്ട്.