പെനിസില്‍വാനിയ: തെരഞ്ഞെടുപ്പ് റാലിക്കിടെ മുന്‍ അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന് നേരെ വെടിയുതിര്‍ത്ത യുവാവ് റിപ്പബ്ലിക്കന്‍ പാര്‍ട്ടി പ്രവര്‍ത്തകനാണെന്ന് അന്വേഷണ സംഘം. അക്രമി 20കാരനായ തോമസ് മാത്യൂ ക്രൂക്‌സ് വോട്ടര്‍ രേഖകള്‍ പ്രകാരം റിപ്പബ്ലിക്കന്‍ പാര്‍ട്ടി പ്രവര്‍ത്തകനാണെന്നാണ് അന്വേഷണ സംഘം സ്ഥിരീകരിച്ചത്. പെനിസില്‍വാനിയയിലെ ബഥേല്‍ പാര്‍ക്കിലെ താമസക്കാരനാണ് പ്രതി. ട്രംപിന് വെടിയേറ്റതിന് പിന്നാലെ സംഭവ സ്ഥലത്തുവെച്ച് തന്നെ യു.എസ് രഹസ്യാന്വേഷണ ഉദ്യോഗസ്ഥര്‍ ഇയാളെ വധിച്ചതായി ഏജന്‍സി വക്താവ് ആന്റണി ഗുഗ്ലിയല്‍മി പറഞ്ഞു. 

അതേസമയം കൊലപാതകത്തിന് പിന്നിലെ ഉദ്ദേശം എന്താണെന്ന് ഇതുവരെ കണ്ടെത്താനായിട്ടില്ല. വെടിവെപ്പിനിടെ വേദിയിലുണ്ടായിരുന്ന ഒരാള്‍ കൊല്ലപ്പെടുകയും രണ്ടുപേര്‍ക്ക് ഗുരുതര പരിക്കേല്‍ക്കുകയും ചെയ്തിട്ടുണ്ട്. അമേരിക്കന്‍ പ്രസിഡന്റ് തെരഞ്ഞെടുപ്പില്‍ റിപ്പബ്ലിക്കന്‍ പാര്‍ട്ടി സ്ഥാനാര്‍ഥിയായ ഡൊണാള്‍ഡ് ട്രംപിന് നേരെ ശനിയാഴ്ച്ച വൈകീട്ടോടെയാണ് വധശ്രമമുണ്ടായത്. ബട്‌ലറില്‍ തെരഞ്ഞെടുപ്പ് റാലിയില്‍ സംസാരിക്കവെ അക്രമി വെടിയുതിര്‍ക്കുകയായിരുന്നു. വെടിവെയ്പ്പില്‍ ട്രംപിന്റെ ചെവിക്ക് പരിക്കേറ്റിരുന്നു. 

യോഗത്തില്‍ ട്രംപ് സംസാരിക്കാന്‍ തുടങ്ങിയതിന് തൊട്ടുപിന്നാലെയാണ് വെടിവെയ്പ്പുണ്ടായത്. വെടിയുണ്ട ട്രംപിന്റെ ചെവിയുടെ മുകള്‍ഭാഗം തുളച്ച് പോകുന്നതിന്റെ ദൃശ്യങ്ങള്‍ പുറത്തുവന്നിരുന്നു. തൊട്ടുപിന്നാലെ സുരക്ഷ ഉദ്യോഗസ്ഥര്‍ ചേര്‍ന്ന് ട്രംപിനെ സുരക്ഷിത സ്ഥാനത്തേക്ക് മാറ്റി. ട്രംപ് സുരക്ഷിതനാണെന്ന് രഹസ്യാന്വേഷണ വിഭാഗം അറിയിച്ചു. സംഭവത്തെ അമേരിക്കന്‍ പ്രസിഡന്റ് ജോ ബൈഡന്‍ അപലപിച്ചിരുന്നു. 

trump assasination attempt attacker identifies as recpublican party member