തിരുവനന്തപുരം: ഒടുവില്‍ ജോയിയെ കണ്ടെത്തി. ജീവനറ്റ നിലയില്‍.കഴിഞ്ഞ മൂന്നു ദിവസമായി തെരച്ചിലിലായിരുന്നു  ശുചീകരണത്തിനിറങ്ങി കനാലില്‍ കാണാതായ തൊഴിലാളി ജോയിക്കായി. പഴവങ്ങാടി തകരപ്പറമ്പ് ചിത്രാ ഹോമിന്റെ പിറകിലെ കനാലില്‍ നിന്നാണ് മൃതദേഹം ലഭിച്ചത്.  മൃതദേഹം അവിടെ പൊങ്ങുകയായിരുന്നു. മൃതദേഹം ജോയിയുടേതാണെന്ന് സ്ഥിരീകരിച്ചു എന്നാണ് റിപ്പോര്‍ട്ട്. 

റെയില്‍വേയില്‍നിന്ന് വെള്ളം ഒഴുകിയെത്തുന്നത് ഇവിടെയാണ്. 46 മണിക്കൂറിനുശേഷമാണ് മൃതദേഹം കണ്ടെത്തിയത്. ജീര്‍ണിച്ച നിലയിലായതിനാല്‍ മൃതദേഹം ഡി.എന്‍.എ പരിശോധനക്ക് വിധേയമാക്കും. 

ജോയിയെ കണ്ടെത്താനുള്ള തെരച്ചില്‍ ഇന്ന് രാവിലെയും കനത്ത മഴ വകവെക്കാതെ തുടരുകയായിരുന്നു. നാവികസേനയുടെ മുങ്ങല്‍ വിദഗ്ധരുടെ നേതൃത്വത്തിലുള്ള സുകൂബ സംഘവും തെരച്ചില്‍ നടത്തുന്നുണ്ടായിരുന്നു. അതിനിടെയാണ് തകരപ്പറമ്പിലെ കനാലില്‍ മൃതദേഹം പൊങ്ങിയതായി വിവരം ലഭിക്കുന്നത്.