ഗുജറാത്തില്‍ ഭീതി പടര്‍ത്തി പുതിയ വൈറസ. രണ്ട് ദിവസത്തിനിടെ നാല് കുട്ടികളാണ് ഇതിനകം മരണത്തിന് കീഴൊതുങ്ങിയത്. ഗുജറാത്തിലെ സബര്‍കാന്ത, ആരവല്ലി ജില്ലകളില്‍ ചന്ദിപുര വൈറസ് ബാധിച്ച് നാല് കുട്ടികള്‍ മരിച്ചതായാണ് വിവരം. കുട്ടികളുടെ മരണത്തെ തുടര്‍ന്ന് പ്രദേശം ജാഗ്രതയിലാണ്.

 ചന്ദിപുര വൈറസ് മൂലമാണ് നാല് കുട്ടികള്‍ മരിച്ചതെന്നാണ് നിഗമനം. ഈ വൈറസ് ബാധിച്ച രണ്ട് കുട്ടികളും ജില്ലയിലെ ഹിമ്മത്‌നഗറിലെ സിവില്‍ ആശുപത്രിയില്‍ ചികിത്സയിലാണ്. ഇവരുടെ സാമ്പിളുകള്‍ പൂനയിലെ നാഷണല്‍ ഇന്‍സ്റ്റിറ്റ്യൂട്ട് ഓഫ് വൈറോളജിയിലേക്ക് (എന്‍ഐവി) അയച്ചിട്ടുണ്ട്. ചന്ദിപുര വൈറസ് ബാധയുടെ വാര്‍ത്തയെ തുടര്‍ന്ന വാര്‍ത്തയെ തുടര്‍ന്ന് രാജ്യത്തെ ആരോഗ്യ ഏജന്‍സികള്‍ ജാഗ്രതയിലാണ്. ജനങ്ങള്‍ പരിഭ്രാന്തരാകരുതെന്നും ആവശ്യമായ മുന്‍കരുതലുകള്‍ എടുക്കണമെന്നും ഗുജറാത്ത് ആരോഗ്യമന്ത്രി റുഷികേശ് പട്ടേല്‍ ജനങ്ങളോട് അഭ്യര്‍ത്ഥിച്ചു. സ്ഥിതിഗതികള്‍ നിയന്ത്രണവിധേയമാണെന്നും മുന്‍കരുതല്‍ എടുക്കണമെന്നും രോഗലക്ഷണങ്ങള്‍ തുടര്‍ന്നാല്‍ ഉടന്‍ വൈദ്യസഹായം തേടണമെന്നും അദ്ദേഹം പി.ടി.ഐയോട് പറഞ്ഞു.

എന്താണ് ചന്ദിപുര വൈറസ്

1966ല്‍ മഹാരാഷ്ട്രയിലാണ് ഇതുമായി ബന്ധപ്പെട്ട ആദ്യത്തെ കേസ് റിപ്പോര്‍ട്ട് ചെയ്തത്. നാഗ്പൂരിലെ ചന്ദിപൂരില്‍ നിന്നാണ് ഈ വൈറസിനെ തിരിച്ചറിഞ്ഞത്, അതിനാലാണ് ഇതിന് ചന്ദിപുര വൈറസ് എന്ന് പേരിട്ടത്. ലോകാരോഗ്യ സംഘടനയുടെ 2017-ലെ മുന്‍ഗണനാ രോഗങ്ങളുടെ പട്ടികയില്‍ ഉള്‍പ്പെടുത്തിയിട്ടുണ്ട്.
15 വയസ്സിന് താഴെയുള്ള കുട്ടികളാണ് ചന്ദിപുര വൈറസിന് ഏറ്റവും കൂടുതല്‍ ഇരയാകുന്നത്. ഈ പ്രായത്തിലുള്ള കുട്ടികളിലാണ് ഏറ്റവും കൂടുതല്‍ മരണനിരക്ക് കാണുന്നത്. ചന്ദിപുരയുടെ ചികിത്സയ്ക്കായി ഇതുവരെ ആന്റി വൈറല്‍ മരുന്ന് കണ്ടെത്തിയിട്ടില്ലെന്നത് ദുരന്തത്തിന്റെ വ്യാപ്തി വര്‍ധിപ്പിക്കുന്നു. .

ചന്ദിപുര വൈറസിന്റെ ലക്ഷണങ്ങള്‍ എന്തൊക്കെ ?

ചന്ദിപുര വൈറസ് കാരണം, രോഗിക്ക് കടുത്ത പനി ഉണ്ടാകും. ഇതിന് ഇന്‍ഫ്‌ലുവന്‍സ പോലുള്ള ലക്ഷണങ്ങളുണ്ട്. അപസ്മാരം, വയറിളക്കം, ഛര്‍ദ്ദി, അണുബാധ മൂലം തലച്ചോറില്‍ വീക്കം എന്നിവ സംഭവിക്കുന്നു. രോഗലക്ഷണങ്ങള്‍ കണ്ടുതുടങ്ങി 48-72 മണിക്കൂറിനുള്ളില്‍ വൈറസ് ബാധിച്ച കുട്ടികള്‍ മരിക്കുന്നുവെന്നാണ് റിപ്പോര്‍ട്ട്. വൈറസ് ബാധിതരായ കുട്ടികളുടെ കുടുംബാംഗങ്ങളുടെ സാമ്പിളുകളും ആരോഗ്യവകുപ്പ് പരിശോധിക്കുന്നുണ്ട്.

ചികിത്സ

ചന്ദിപുര വൈറസിന് പ്രത്യേക ആന്റിവൈറല്‍ ചികിത്സ ലഭ്യമല്ല. രക്തപ്രവാഹത്തിന്റെ അഭാവം മൂലം ന്യൂറോണുകളെയോ നാഡീകോശങ്ങളെയോ സംരക്ഷിക്കുന്നതിനാണ് അടിയന്തിര ചികിത്സ ലക്ഷ്യമിടുന്നത്, ഇത് ദീര്‍ഘകാല ന്യൂറോളജിക്കല്‍ സങ്കീര്‍ണതകള്‍ തടയുന്നതിന് അത്യാവശ്യമാണ്. നല്ല പോഷകാഹാരം, ആരോഗ്യം, ശുചിത്വം, അവബോധം എന്നിവ നിലനിര്‍ത്തുന്നതും വൈറസിനെ നിയന്ത്രിക്കാന്‍ സഹായിക്കും.

A new virus causing fear in Gujarat. Four children have died in the past two days due to the Chandipura virus in Sabarkantha and Aravalli districts