കാഞ്ഞങ്ങാട്: സ്വകാര്യ ബസില്‍ യുവതിക്കുനേരെ നഗ്‌നതാ പ്രദര്‍ശനം നടത്തിയ ആളെ പൊലിസ് പിടികൂടി. കാസര്‍കോട് കുണിയ സ്വദേശി മുഹമ്മദ് കുഞ്ഞിയെയാണ് ബേക്കല്‍ പൊലിസ് ബുധനാഴ്ച അറസ്റ്റ് ചെയ്തത്. പ്രതി മാനസികവെല്ലുവിളി നേരിടുന്നയാളാണെന്നാണ് പൊലിസ് പറയുന്നത്

കഴിഞ്ഞ ദിവസം ആറു വയസുള്ള മകളുമൊത്ത് യാത്ര ചെയ്യുമ്പോഴാണ് യുവതിക്ക് ദുരനുഭവം നേരിട്ടത്. യുവതി കാഞ്ഞങ്ങാട് നിന്നും പാലക്കുന്നിലേക്ക് പോകുമ്പോഴാണ് സംഭവം. ബസ് പുറപ്പെട്ടതിനു ശേഷം വഴിയില്‍ നിന്നും കയറിയ യുവാവാണ് യുവതിയുടെ എതിര്‍വശത്തെ സീറ്റിലിരുന്ന് നഗ്‌നത പ്രദര്‍ശിപ്പിച്ചത്. 

ബസ് കണ്ടക്ടര്‍ പിറകിലായിരുന്നതിനാല്‍ സമയത്ത് വിവരം അറിയിക്കാന്‍ കഴിഞ്ഞില്ല. ഇതേത്തുടര്‍ന്ന് മൊബൈലില്‍ രംഗം പകര്‍ത്തുകയായിരുന്നു. ബസ് ബേക്കല്‍ പൊലിസ് സ്റ്റേഷനിലെത്തിച്ച് പരാതി പറയാനായിരുന്നു യുവതിയുടെ നീക്കം. എന്നാല്‍ സംശയം തോന്നിയ യുവാവ് അടുത്ത സ്റ്റോപ്പിലിറങ്ങി രക്ഷപ്പെടുകയായിരുന്നു. പിന്നീടാണ് യുവതി വിവരം കണ്ടക്ടറോട് പറയുന്നത്. 

ഇയാളുടെ ദൃശ്യങ്ങള്‍ യുവതി തന്നെയാണ് മൊബൈല്‍ഫോണില്‍ പകര്‍ത്തി സാമൂഹികമാധ്യമങ്ങളിലൂടെ പുറത്തുവിട്ടത്. ദൃശ്യങ്ങള്‍ പ്രചരിച്ചതോടെ പൊലിസ് കേസെടുത്ത് അന്വേഷണം നടത്തുകയും പ്രതിയെ പിടികൂടുകയുമായിരുന്നു.