കോഴിക്കോട്: മുദ്രപത്രത്തിന് വേണ്ടി നെട്ടോട്ടമോടി സാധാരണക്കാര്‍. കോഴിക്കോട് ജില്ലാ കോടതിയില്‍ പോലും 100 രൂപയുടെ മുദ്രപത്രം ലഭിക്കാനില്ല. മറ്റ് സ്ഥലത്തും സമാന സ്ഥിതി തന്നെ. മാസങ്ങളായി സര്‍ക്കാര്‍ അച്ചടി നിര്‍ത്തിയതുകൊണ്ടാണ് മുദ്രപത്രങ്ങള്‍ക്ക് ക്ഷാമമെന്നാണ് വെണ്ടര്‍മാര്‍ പറയുന്നത്. അതുകൊണ്ട് തന്നെ ചെറിയ ആവശ്യങ്ങള്‍ക്ക് പോലും സാധാരണക്കാര്‍  അഞ്ഞൂറിന്റേതും ആരിരത്തിന്റേതും വാങ്ങേണ്ട സ്ഥിതിയാണുള്ളത്. 

സര്‍ക്കാരുമായി ബന്ധപ്പെട്ട സത്യവാങ്മൂലങ്ങള്‍ക്ക് 100 മുതല്‍ 200 രൂപ വരെയുള്ള മുദ്രപത്രത്തിന്റെ ആവശ്യമേയുള്ളൂ ഇതിനെല്ലാം അഞ്ഞൂറ് രൂപയുടേതാണ് വാങ്ങേണ്ടിവരുന്നത്. 

കുറഞ്ഞ തുകയ്ക്കുള്ള മുദ്ര പത്രങ്ങളുടെ ദൗര്‍ലഭ്യം സംസ്ഥാനത്തെ 1,500ഓളം വെണ്ടര്‍മാരുടെ ജീവിതത്തെയും ബാധിച്ചിട്ടുണ്ട്. രജിസ്‌ട്രേഷന്‍ നടപടിയും മുടങ്ങുന്ന സ്ഥിതിയാണ് നിലവിലുള്ളത്. രാജ്യത്തുടനീളം ഇ-സ്റ്റാമ്പിംഗ് നടപ്പിലാക്കുന്നതിന്റെ ഭാഗമായി മുദ്രപത്രം അച്ചടി നിര്‍ത്തിയതാണ് പ്രതിസന്ധിക്ക് കാരണം
 
അതേസമയം സര്‍ക്കാര്‍ പ്രഖ്യാപിച്ച ഇ-സ്റ്റാമ്പിംഗ് ഇതുവരെ പൂര്‍ണ സജ്ജമായിട്ടില്ല. ഇ-സ്റ്റാമ്പിംഗ് നടപ്പാക്കുന്നതിനൊപ്പം പ്രിന്റ് ചെയ്ത മുദ്രപത്രങ്ങള്‍ കൂടി വിതരണം ചെയ്ത്, കാലക്രമേണ പൂര്‍ണമായും ഇ സ്റ്റാമ്പിംഗിലേക്ക് മാറിയിരുന്നെങ്കില്‍ നിലവിലെ അവസ്ഥ ഉണ്ടാകുമായിരുന്നില്ല. 

എത്രയും പെട്ടെന്ന് ഇ-സ്റ്റാമ്പിങ്ങിലേക്ക് മാറി പ്രതിസന്ധി പരിഹരിക്കുമെന്ന പതിവ് പല്ലവിയാണ് ട്രഷറി ഡയറക്റ്ററേറ്റിന്റെ മറുപടി. ചെറിയ മൂല്യമുള്ളമുദ്രപത്രങ്ങള്‍ എത്രയും പെട്ടെന്ന് വിപണിയില്‍ ലഭ്യമാക്കണമെന്നും പൊതുജന ആവശ്യം മുന്‍നിര്‍ത്തി ഇക്കാര്യത്തില്‍ സര്‍ക്കാറിന്റെ അടിയന്തര ശ്രദ്ധ പതിയണമെന്നും ആധാരമെഴുത്തുകാര്‍ ആവശ്യപ്പെടുന്നത്.