പത്തനംതിട്ട:ബ്രഹ്മപുരം തീപിടിത്തത്തിൻ്റെ പശ്ചാത്തലത്തിൽ സംസ്ഥാനത്തെ മാലിന്യപ്രശ്നം പരിഹരിക്കാനുള്ള യത്നത്തിന്റെ ഭാഗമായി ആരംഭിച്ച ''മാലിന്യമുക്തം നവകേരളം'' കാംപയിൻ ഉദ്ദേശലക്ഷ്യം സാധിക്കാതെ പ്രഖ്യാപനങ്ങളിലൊതുങ്ങി. കഴിഞ്ഞ വർഷം പരിസ്ഥിതി ദിനമായ ജൂൺ 5 ന് മുഖ്യമന്ത്രി ഉദ്ഘാടനം ചെയ്ത പദ്ധതി പ്രകാരം എല്ലാ തദ്ദേശ സ്വയംഭരണ സ്ഥാപനങ്ങളും മാലിന്യം വലിച്ചെറിയൽ മുക്തമാകുമെന്നായിരുന്നു വ്യക്തമാക്കിയത്.മാലിന്യം എവിടെക്കണ്ടാലും ആർക്കും അതിന്റെ ഫോട്ടോയോ വീഡിയോയോ പകർത്തി ബന്ധപ്പെട്ടവർക്ക അയച്ചു കൊടുക്കാമെന്നും നിശ്ചിത സമയത്തിനുള്ളിൽ അത് നീക്കം ചെയ്യുമെന്നായിരുന്നു വാഗ്ദാനം. എന്നാൽ പദ്ധതി ഒരടിപോലും മുന്നോട്ട് പോയില്ലെന്നതിൻ്റെ തെളിവാണ് തലസ്ഥാനത്ത് ആമയിഴഞ്ചാൻ തോട്ടിൽ ശുചീകരണ തൊഴിലാളി മാലിന്യ കൂമ്പാരത്തിൽ മുങ്ങി മരിച്ച സംഭവം.

ടൺകണക്കിന് മാലിന്യമാണ് ഇതുപോലെ സംസ്ഥാനത്ത് എമ്പാടും തോടുകളിൽ നിറഞ്ഞു കിടക്കുന്നത്.അവശ്യ സർവീസായ ആരോഗ്യവകുപ്പിൽ പ്രതിരോധ പ്രവർത്തനങ്ങൾക്കും ഫീൽഡിലെത്തി വിലയിരുത്താനും സാമ്പിളുകൾ ശേഖരിക്കാനും ആവശ്യത്തിന് ജീവനക്കാരില്ലെന്നാണ് പരാതി. ഓരോ ജില്ലയിലും 200 ഓളം ജീവനക്കാരുടെ കുറവുള്ളതായാണ് ജീവനക്കാരുടെ സംഘടനകൾ ചൂണ്ടിക്കാട്ടുന്നത്. ഹെൽത്ത് സൂപ്പർവൈസർ, ടെക്നിക്കൽ അസിസ്റ്റന്റ് ഗ്രേഡ് 1, ഗ്രേഡ് 2, ഹെൽത്ത് ഇൻസ്പെക്ടർ, ജൂനിയർ ഹെൽത്ത് ഇൻസ്പെക്ടർ തുടങ്ങി തസ്തികകളാണ് പൂർണമായും നികത്താത്തത്.

ആരോഗ്യ പ്രവർത്തകർക്കും ഉദ്യോഗസ്ഥർക്കും സഞ്ചരിക്കാൻ ആവശ്യത്തിന് വാഹനങ്ങൾ ഇല്ലെന്ന് ജീവനക്കാർ ചൂണ്ടിക്കാട്ടുന്നു.15 വർഷത്തിലേറെ പഴക്കമുള്ള 850 വാഹനങ്ങൾ ഈയിടെ ഒറ്റയടിക്ക് കണ്ടം ചെയ്തപ്പോൾ പകരം വാഹനങ്ങൾ ഏർപ്പെടുത്താതിരുന്നതോടെ പ്രവർത്തനങ്ങൾ താളം തെറ്റുകയായിരുന്നു.ജില്ലാ മെഡിക്കൽ ഓഫീസുകളിൽ പരമാവധി 12 വാഹനങ്ങൾ ആവശ്യമുള്ളപ്പോൾ പേരിന് മാത്രമായി മാറിയെന്നാണ് ആരോഗ്യ വകുപ്പിൽ നിന്നറിയുന്നത്.സാമ്പത്തിക പ്രതിസന്ധി കാരണം വകുപ്പിൽ പുതിയ വാഹനങ്ങൾ വാങ്ങുന്നതിലും നിയന്ത്രണം ഏർപ്പെടുത്തിയിട്ടുള്ളത് ഫീൽഡ് പ്രവർത്തനങ്ങളെ ബാധിച്ചു കഴിഞ്ഞു.

സാമ്പത്തിക പ്രതിസന്ധി മൂലം

കൊതുക് നശീകരണ പ്രവർത്തനങ്ങൾ പോലും നിലച്ചമട്ടാണ്. ജൈവമാലിന്യം ഉറവിടത്തിലോ സാമൂഹ്യതല സംവിധാനത്തിലോ പൂർണമായി സംസ്‌കരിക്കുന്നുവെന്ന് ഉറപ്പാക്കാൻ പോലും ആരോഗ്യ വകുപ്പിന് കഴിഞ്ഞിട്ടില്ല. പൊതുനിരത്തുകളിലും ജലാശയങ്ങളിലും നിക്ഷേപിക്കപ്പെട്ടിട്ടുള്ള മാലിന്യം സമ്പൂർണമായി നീക്കംചെയ്യണമെന്നതും പ്രഖ്യാപനം മാത്രമായി മാറി.

he health department is facing a staff shortage, causing the Clean Kerala campaign to be limited to announcements without effective implementation.