മസ്‌കത്ത്:  മൈക്രോസോഫ്റ്റ് വിന്‍ഡോസ് ഓപ്പറേറ്റിംഗ് സിസ്റ്റം സാങ്കേതിക പ്രശ്‌നം നേരിടുന്നതിനെ തുടര്‍ന്ന് മസ്‌കത്തില്‍ നിന്നും കേരളത്തിലേക്കുള്ള വിമാനങ്ങള്‍ വൈകുന്നു. മസ്‌കറ്റില്‍ നിന്നും കൊച്ചിയിലേക്കും തിരുവനന്തപുരത്തേക്കും പുറപ്പെടേണ്ട എയര്‍ ഇന്ത്യ എക്‌സ്പ്രസ് വിമാനങ്ങളാണ് വൈകുന്നത്. യാത്രക്കാര്‍ ഇതോടെ പ്രതിസന്ധിയിലായി. 

അതേസമയം, വിന്‍ഡോസ് ക്ലൗഡ് സെര്‍വറിലെ തകരാര്‍ വിമാനത്താവളങ്ങളുടെ പ്രവര്‍ത്തനത്തെ ബാധിച്ചിട്ടുണ്ട്. കേരളത്തിലെ വിമാനത്താവളങ്ങളിലെ ചെക്ക്-ഇന്‍ നടപടികള്‍ മാന്വല്‍ രീതിയിലേക്ക് മാറ്റിയിട്ടുണ്ട്. നെടുമ്പാശേരിയില്‍ നിന്നും ബെംഗളുരുവിലേക്ക് പുറപ്പെടേണ്ട ആറ് വിമാനങ്ങള്‍ വൈകി. 

വിന്‍ഡോസ് അധിഷ്ഠിത കംപ്യൂട്ടറുകളുടെ നെറ്റ്വര്‍ക്കില്‍ സൈബര്‍ സുരക്ഷാ സേവനമായ ക്രൗഡ് സ്ട്രൈക്കിന്റെ പുതിയ അപ്ഡേറ്റ് ഇന്‍സ്റ്റാള്‍ ചെയ്യപ്പെട്ടതോടെയാണ് പ്രശ്‌നങ്ങള്‍ തുടങ്ങിയത്. മൈക്രോസോഫ്റ്റിന്റെ അഷ്വര്‍ ക്ലൗഡ് സേവനങ്ങളെ ബാധിച്ചതോടെയാണ് എയര്‍ലൈന്‍, ബാങ്കിങ് ഉള്‍പ്പടെയുള്ള സേവനങ്ങളുടെ പ്രവര്‍ത്തനങ്ങള്‍ തടസപ്പെട്ടത്.