ഇന്ത്യയിലെ വിദേശ യാത്രക്കാര്‍ക്ക് വണ്‍ വേള്‍ഡ് യു.പി.ഐ വാലറ്റ് (One World UPI wallet) പരിചയപ്പെടുത്തി നാഷ്ണല്‍ പേയ്‌മെന്റ് കോര്‍പ്പറേഷന്‍ ഓഫ് ഇന്ത്യ (NPCI).  

ഇന്ത്യന്‍ സിം കാര്‍ഡോ, ഇന്ത്യന്‍ ബാങ്ക് അക്കൗണ്ടോ ഇല്ലാതെ തന്നെ പണമിടപാടുകള്‍ നടത്താനാകും എന്നതാണ് ഇതിന്റെ പ്രത്യേകത. പ്രീപേയ്ഡ് പേയ്മന്റ് ഇന്‍സ്ട്രുമന്റ് (PPI) എന്ന ടെക്‌നോളജിയാണ് ഇതിനായി ഉപയോഗിച്ചിരിക്കുന്നത്.

ഇങ്ങനേയൊരു അന്താരാഷ്ട്ര ഡിജിറ്റല്‍ പേയ്മന്റ് എക്കോസിസ്റ്റത്തെ പരിചയപ്പെടുത്തുന്നതിലൂടെ ഇന്ത്യയുടെ ഒരു പുതിയ ചുവടുവെപ്പാകും ഇതെന്നാണ് എന്‍.പി.സി.ഐ വിലയിരുത്തുന്നത്. 2023ലെ ജി20 ഇന്ത്യ ഉച്ചക്കോടിയിലാണ് വേള്‍ഡ് യു.പി.ഐ വാലറ്റ് (One World UPI wallet) ആദ്യമായി കൊണ്ടുവരുന്നത്.

അടിസ്ഥാനപരമായി ഒരു പ്രീപേയ്ഡ് വാലറ്റ് ആയ ഇത്, ഉപഭോക്താക്കള്‍ക്ക് സുഖകരമായി പണമിടപാടുകള്‍ നടത്താനും സഹായിക്കുന്നതോടൊപ്പം, സീറോ ട്രാന്‍സാക്ഷനും ഓണ്‍ബോര്‍ഡിംഗ് ഫീസും ഉപയോഗിച്ച് പണം കൈമാറ്റം ചെയ്യുന്നതിനുള്ള ബുദ്ധിമുട്ട് ഇല്ലാതാക്കുകയും ചെയ്യുന്നു. ഇതിനായി ആദ്യം ഉപഭോക്താവിന്റെ ഇന്റര്‍ണാഷ്ണല്‍ ഫോണ്‍ നമ്പറും, പാസ്സ്‌പോര്‍ട്ടും, വിസയും ഉപയോഗിച്ച് കെ.വൈ.സി (KYC) നടപടിക്രമങ്ങള്‍ പൂര്‍ത്തീകരിക്കേണ്ടതാണ്.

വണ്‍ വേള്‍ഡ് യു.പി.ഐ ഇപ്പോള്‍ എന്‍.പി.സി.ഐയുടെ പങ്കാളികളായ ഐ.ഡി.എഫ്.സി ഫസ്റ്റ് ബാങ്ക് (IDFC First Bank), ട്രാന്‍സ്‌കോര്‍പ്പ് എന്നിവയിലാണ് ലഭ്യമാകുന്നത്. 

ഉപയോക്താക്കള്‍ക്ക് തങ്ങളുടെ ക്രെഡിറ്റ് കാര്‍ഡോ, ഡെബിറ്റ് കാര്‍ഡോ ഉപയോഗിച്ചും പണം സ്വന്തം വണ്‍ വേള്‍ഡ് യു.പി.ഐ വോളറ്റിലേക്ക് മാറ്റാവുന്നതാണ്. ഇടപാടുകളുടെ പരിതിയെപ്പറ്റിയുള്ള വിവരങ്ങളും ഒറിജിനല്‍ അക്കൗണ്ടിലേക്ക് തിരിച്ച് പണം അയക്കാമോ എന്നതിനേക്കുറിച്ചുള്ള വിവരങ്ങളും പിന്നീട് അറിയിക്കുന്നതായിരിക്കും.