കൊച്ചി: ഫ്രഞ്ച് പ്രതിരോധ താരം അലക്‌സാണ്ടര്‍ കോഫിനെ ടീമിലെത്തിച്ച് കേരള ബ്ലാസ്‌റ്റേഴ്‌സ്. ഒരു വര്‍ഷത്തെ കരാറാണ് താരം ക്ലബില്‍ ഒപ്പുവച്ചിരിക്കുന്നത്. ഫ്രഞ്ച് ലീഗ് 2ല്‍ എസ്.എം കെയ്‌നിനായാണ് താരം അവസാനമായി കളിച്ചത്. സെന്റര്‍ ബാക്കില്‍ കളിച്ചാണ് താരം അനുഭവ സമ്പത്ത് നേടിയതെങ്കിലും ഡിഫെന്‍സിവ് മിഡ്ഫീല്‍ഡറായും, റൈറ്റ് ബാക്കായും അലക്‌സാണ്ടര്‍ കോഫ് കഴിവ് തെളിയിച്ചിട്ടുണ്ട്.ഫ്രാന്‍സില്‍ ജനിച്ച കോഫ്, വിവിധ ലീഗുകളിലും ഭൂഖണ്ഡങ്ങളിലും തന്റെ കഴിവുകള്‍ തെളിയിച്ച് മികച്ച പ്രകടനങ്ങള്‍ നടത്തിയിട്ടുണ്ട്. 

2008ല്‍ ആര്‍.സി ലെന്‍സ് അക്കാദമിയിലേക്ക് മാറുന്നതിന് മുമ്പ് പ്ലൂസാന്‍ അത്‌ലറ്റിക്, സ്റ്റേഡ് ബ്രെസ്റ്റോയിസ് 29, ഗില്ലേഴ്‌സ്, കാവലെ ബ്ലാഞ്ചെ ബ്രെസ്റ്റ് എന്നീ യുവനിരകളിലാണ് താരം തന്റെ കരിയറിന്റെ ആദ്യഭാഗം കളിച്ചത്. തുടര്‍ന്ന് ക്ലബ്ബിന്റെ യുവനിരയിലൂടെ നടത്തിയ ശ്രദ്ധേയമായ പ്രകടനങ്ങള്‍ 16ാം വയസില്‍ ആര്‍സി ലെന്‍സില്‍ നിന്ന് അദ്ദേഹത്തിന് ആദ്യത്തെ പ്രൊഫഷനല്‍ കരാര്‍ ലഭിക്കാന്‍ കാരണമായി. തുടര്‍ന്ന് ലിഗ് 1 ല്‍ താരം 56 മത്സരങ്ങള്‍ കളിച്ചു. 2013 ലെ ഇറ്റാലിയന്‍ സീരി എ ക്ലബ് ഉഡിനീസില്‍ നിന്നാണ് കോഫിന്റെ പ്രൊഫഷണല്‍ കരിയര്‍ ആരംഭിച്ചത്. 2014ല്‍ ലാ ലിഗ ക്ലബായ ഗ്രാനഡ എഫ്‌സിയിലേക്ക് താരം ലോണില്‍ പോയി. 

2018നും 2023നും ഇടയില്‍, 32കാരന്‍ അജാസിയോ, ഓക്‌സെറെ (ഫ്രാന്‍സ്), ബ്രെസിയ (ഇറ്റലി) എന്നീ ക്ലബ്ബുകളിലും കളിച്ചിട്ടുണ്ട്. പല ലീഗുകളിലായി തന്റെ കരിയറില്‍ ഉടനീളം 320 മത്സരങ്ങളാണ് കോഫ് ബൂട്ടണിഞ്ഞത്.