മലപ്പുറം: മദ്‌റസ അധ്യാപക ക്ഷേമനിധിയിലേക്കുള്ള സർക്കാർ ഗ്രാൻ്റ് ലഭിക്കാതായിട്ട് എട്ട് വർഷം. യു.ഡി.എഫ് ഭരിച്ചിരുന്ന 2015-16 ലാണ് അവസാനമായി ക്ഷേമനിധിയിലേക്ക് സർക്കാർ ഗ്രാൻ്റ് നൽകിയത്. 3.75 കോടിയാണ് അനുവദിച്ചത്. പിന്നീട് വന്ന ഇടതുസർക്കാർ ഇതുവരെ ഗ്രാൻ്റ് അനുവദിച്ചിട്ടില്ല. മദ്‌റസ അധ്യാപകരും മാനേജ്‌മെന്റ് കമ്മറ്റിയും മാസാമാസം ക്ഷേമനിധിയിലേക്ക് നൽകുന്ന വിഹിതം പലിശ രഹിത അക്കൗണ്ടിൽ ട്രഷറിയിൽ നിക്ഷേപിച്ചിരിക്കുകയാണ്. ഈ നിക്ഷേപത്തിന് ഇൻസെന്റീവ് ആയി നാലു കോടി രൂപ 2022 ൽ ക്ഷേമനിധിയിലേക്ക് ലഭിച്ചിട്ടുണ്ട്. ഈ വർഷവും ക്ഷേമനിധിയിക്കായി ബജറ്റിൽ ഫണ്ട് വകയിരുത്തിയിട്ടില്ല.

അധ്യാപകർ അടക്കുന്ന വിഹിതത്തിൽ നിന്നാണ് ക്ഷേമ പെൻഷനും മറ്റു ആനുകൂല്യങ്ങളും നൽകി വരുന്നത്. ക്ഷേമനിധിയിൽ അംഗമായി മിനിമം അഞ്ച് വർഷമെങ്കിലും വിഹിതം അടച്ചവർക്ക് 1500 രൂപയാണ് പ്രതിമാസ പെൻഷനായി നൽകുന്നത്. ക്ഷേമനിധിയിൽ ചേർന്ന കാലാവധിക്ക് ആനുപാതികമായി 7500 രൂപ വരെ പെൻഷന് അർഹതയുണ്ട്. ക്ഷേമനിധി പെൻഷനോടൊപ്പം കഴിഞ്ഞ വർഷം വരെ ഇവർക്ക് ഒരു സാമൂഹ്യ സുരക്ഷാ പെൻഷനും കൂടി നൽകിയിരുന്നു.

 ക്ഷേമനിധിയിയിലേക്ക് സർക്കാർ ഗ്രാൻ്റ് നൽകുന്നുണ്ടെന്ന് പറഞ്ഞ് ഇത് നിർത്തലാക്കി. പിന്നോക്കം നിൽക്കുന്ന മദ്‌റസ അധ്യാപകർക്ക് ക്ഷേമനിധി ഏർപ്പെടുത്തണമെന്ന പാലൊളി കമ്മിറ്റിയുടെ നിർദേശത്തിലാണ് ഗ്രാൻ്റ് നൽകാൻ തീരുമാനിച്ചിരുന്നത്. കാലാകാലങ്ങളിൽ മദ്‌റസ അധ്യാപകർക്ക് നൽകേണ്ട ആനുകൂല്യങ്ങൾക്ക് ആവശ്യമായ തുക ഓരോ വർഷവും ബജറ്റിൽ നീക്കിവെക്കുമെന്നും 2012 ലെ ഉത്തരവിലുണ്ടായിരുന്നു.

Madrasa Teacher Welfare Fund Government Grant Delayed for Eight Years