ന്യൂഡല്‍ഹി: അടിയന്തര സഹായങ്ങള്‍ സുഗമമാക്കുന്നതിനായി വയനാട് ഉരുള്‍പൊട്ടലിനെ രൂക്ഷമായ പ്രകൃതി ദുരന്തങ്ങളുടെ പട്ടികയില്‍ ഉള്‍പ്പെടുത്തണമെന്ന് എംപി ശശിതരൂര്‍. ഇതു ചൂണ്ടിക്കാട്ടി തരൂര്‍ ആഭ്യന്തരമന്ത്രി അമിത്ഷായ്ക്ക് കത്തയച്ചു. ഈ പട്ടികയില്‍ ഉള്‍പെടുത്തിയാല്‍ പ്രാദേശിക വികസന ഫണ്ടില്‍ നിന്ന് പാര്‍ലമെന്റംഗങ്ങള്‍ക്ക് ഒരു കോടി വരെയുള്ള പ്രവൃത്തികള്‍ക്ക് ശുപാര്‍ശനല്‍കാനാവും.

സമാനതകളില്ലാത്ത ദുരന്തത്തെ നേരിടുന്ന വയനാടിന് ഇതേറെ ആശ്വാസമാകുമെന്നും അമിത്ഷായ്ക്ക്  അയച്ച കത്തില്‍ പറയുന്നു. ജൂലൈ 30ാം തിയതി രാത്രി വയനാട്ടില്‍ ഉണ്ടായ ഉരുള്‍പൊട്ടലില്‍ നൂറിലധികം പേര്‍ക്കാണ് ജീവന്‍ നഷ്ടമായത്. നിരവധിപേര്‍ക്കു പരുക്കേല്‍ക്കുകയും ഒരുപാടാളുകളെ കാണാതാവുകയും ചെയ്തു. നിരവധിയാളുകള്‍ ആശുപത്രിയില്‍ ചികിത്സയിലാണെന്നും അമിത് ഷായ്ക്ക് അയച്ച കത്തില്‍ പറയുന്നു. 

ഇപ്പോഴും പലരും മണ്ണിനടിയില്‍ തന്നെ കുടുങ്ങിക്കിടക്കുകയാണെന്നും ഇതുവരെ കേരളം കാണാത്തത്ര വേദനാജനകമായ കാഴ്ചയാണ് വയനാട്ടിലുണ്ടായതെന്നും തരൂര്‍ പറഞ്ഞു. ഈ സന്ദര്‍ഭത്തില്‍ വയനാട്ടിലെ ജനങ്ങള്‍ക്ക് സാധ്യമായതെല്ലാം ചെയ്യേണ്ടതുണ്ട്.

രൂക്ഷമായ പ്രകൃതിദുരന്തങ്ങളുടെ പട്ടികയിലുള്‍പ്പെടുത്തിയാല്‍ പാര്‍ലമെന്റംഗങ്ങള്‍ക്ക് ഒരുകോടി രൂപ വരെയുള്ള പ്രവൃത്തികള്‍ക്ക് ശുപാര്‍ശനല്‍കാനാവുമെന്നും ദുരിതാശ്വാസത്തിനും പുനരധിവാസത്തിനും വേണ്ടിയുള്ള പ്രവര്‍ത്തനങ്ങള്‍ക്ക് ഇത് മുതല്‍ക്കൂട്ടാകുമെന്നും ശശിതരൂര്‍. ഈ അഭ്യര്‍ഥന കേന്ദ്ര ആഭ്യന്തര മന്ത്രാലയം പരിഗണിക്കുമെന്ന് പ്രതീക്ഷിക്കുന്നുവെന്നും കത്തില്‍ പറയുന്നു. വയനാട്ടിലെ മരണസംഖ്യ ഇനിയും ഉയരുമെന്നും 250ഓളം പേരെ കാണാനില്ലെന്നും റിപോര്‍ട്ടുകള്‍.