ന്യൂഡല്‍ഹി:മുനമ്പം വഖഫ് ഭൂമിയല്ലെന്ന ഹൈക്കോടതി ഉത്തരവിനെതിരെ കേരള വഖഫ് ബോര്‍ഡ് സുപ്രിംകോടതിയില്‍ ഹരജി നല്‍കി. വിശദമായ വാദം കേള്‍ക്കണമെന്നാണ് ആവശ്യം. ജസ്റ്റിസ് സി.എന്‍ രാമചന്ദ്രന്‍ നായരെ ജുഡീഷ്യല്‍ കമ്മിഷനായി നിയമിച്ച സംസ്ഥാന സര്‍ക്കാരിന്റെ നടപടി നിയമവിരുദ്ധമാണെന്ന് ബോര്‍ഡ് ആരോപിച്ചു. മുനമ്പം ഭൂമി വഖഫ് ആണോ അല്ലയോ എന്ന് തീരുമാനിക്കേണ്ടത് വഖഫ് ട്രിബ്യൂണല്‍ ആണെന്നും ഹരജിയില്‍ ചൂണ്ടിക്കാട്ടിയിട്ടുണ്ട്. 

മുനമ്പത്തേക്ക് വഖഫ് ഭൂമിയല്ലെന്ന ഹൈക്കോടതി ഉത്തരവ് സുപ്രിംകോടതി നേരത്തെ സ്‌റ്റേ ചെയ്തിരുന്നു. വഖഫ് സംരക്ഷണവേദിയുടെ ഹരജിയിലായിരുന്നു സ്റ്റേ. എന്നാല്‍ മുനമ്പത്തെ 404.76 ഏക്കര്‍ വിസ്തൃതിയുള്ള ഭൂമിയുടെ നിലയും വ്യാപ്തിയും പരിശോധിക്കാന്‍ ജസ്റ്റിസ് സി.എന്‍ രാമചന്ദ്രന്‍ കമ്മിഷനെ നിയമിച്ച സംസ്ഥാന സര്‍ക്കാരിന്റെ തീരുമാനം ശരിവച്ച ഹൈക്കോടതി ഉത്തരവ് സുപ്രിംകോടതി സ്റ്റേ ചെയ്തിരുന്നില്ല. 

ALSO READ: കെഎസ്‍യു പ്രവർത്തകർക്കെതിരെ വധശ്രമത്തിന് കേസെടുത്തതിൽ വിശദീകരണവുമായി ഡിജിപി; വിശദമായ പരിശോധനയും അന്വേഷണവുമുണ്ടാകും

പരിഗണനാ വിഷയം മറികടന്നാണ് മുനമ്പത്തെ ഭൂമി വഖ്ഫല്ലെന്ന് ഹൈക്കോടതി വിധിച്ചതെന്ന് ബെഞ്ച് ചൂണ്ടിക്കാട്ടി. ഹൈക്കോടതി ഉത്തരവിലെ മറ്റ് ഭാഗങ്ങള്‍ക്ക് സ്റ്റേ ബാധകമല്ലെന്നും ബെഞ്ച് വ്യക്തമാക്കിയിരുന്നു. 

അതേസമയം, ഹൈക്കോടതി ഉത്തരവിനെതിരെ വഖഫ് ബോര്‍ഡ് നേരത്തെ ഹരജി സമര്‍പ്പിച്ചിരുന്നില്ല. ഹൈക്കോടതിയില്‍ പുനപരിശോധന ഹരജി സമര്‍പ്പിച്ചെങ്കിലും പിന്നീടത് പിന്‍വലിച്ചിരുന്നു. ഇതിന് പിന്നാലെയാണ് ഇപ്പോള്‍ സുപ്രിംകോടതിയെ സമീപിച്ചിരിക്കുന്നത്. 

In the Munambam case, the Waqf Board has approached the Supreme Court challenging the recent High Court order. The move comes amid an ongoing legal dispute related to land and administrative matters involving the Board.