ന്യൂഡല്‍ഹി: ഇറാനെതിരെ ഇസ്‌റാഈല്‍ നടത്തിയ ആക്രമണത്തിന് പിന്നാലെ നിലവിലെ സാഹചര്യങ്ങള്‍ കണക്കിലെടുത്ത് ഗള്‍ഫ് രാജ്യങ്ങളിലേക്കുള്ള എയര്‍ ഇന്ത്യ, ഇന്‍ഡിഗോ വിമാനങ്ങള്‍ റദ്ദാക്കി. യാത്രക്കാരുടെയും ജീവനക്കാരുടേയും സുരക്ഷയ്ക്കാണ് പരിഗണന നല്‍കുന്നതെന്നും അത് കണക്കിലെടുത്താണ് തീരുമാനമെന്നും എയര്‍ഇന്ത്യ അറിയിച്ചു. സാഹചര്യങ്ങള്‍ നിരന്തരം വിലയിരുത്തുന്നുണ്ടെന്നും അതിനനുസരിച്ച് തീരുമാനത്തില്‍ ആവശ്യമായ മാറ്റങ്ങള്‍ വരുത്തുമെന്നും എയര്‍ ഇന്ത്യ പുറത്തിറക്കിയ പ്രസ്താവനയില്‍ അറിയിച്ചു. 

മധ്യപൂര്‍വേഷ്യയിലേക്കും തിരിച്ചുമുള്ള എല്ലാ വിമാന സര്‍വീസുകളും അര്‍ധരാത്രി വരെ റദ്ദാക്കിയിരിക്കുന്നതായി ഇന്‍ഡിഗോയും അറിയിച്ചു. നിലവിലെ സാഹചര്യങ്ങള്‍ സസൂഷ്മം നിരീക്ഷിച്ചുവരികയാണെന്നും തടസ്സങ്ങള്‍ പരമാവധി ഒഴിവാക്കുന്നതിനായി വിമാന സര്‍വീസുകള്‍ പുനക്രമീകരിക്കുന്നതിനുള്ള നടപടികള്‍ സ്വീകരിച്ചുവരികയാണെന്നും ഇന്‍ഡിഗോ അറിയിച്ചു. 

ആക്രമണത്തിന് പിന്നാലെ ഇറാനും ഇറാഖും ഇസ്‌റാഈലും വ്യോമപാതകള്‍ അടച്ചിരുന്നു. തൊട്ടുപിന്നാലെയാണ് യു.എ.ഇയും ഖത്തറും വ്യോമപാത അടയ്ക്കുന്നതായി അറിയിച്ചത്.

Air India and IndiGo have cancelled all services to Gulf countries amid escalating security concerns in the region. The decision follows heightened tensions in the Middle East, prompting airlines to prioritize passenger safety and operational security.