തിരുവനന്തപുരം: കനത്ത മഴയ്ക്ക് ശമനമുണ്ടെങ്കിലും സംസ്ഥാനത്ത് മഴ ജാഗ്രത തുടരും. ശക്തമായ മഴയ്ക്ക് സാധ്യതയുള്ള നാല് ജില്ലകളിൽ യെല്ലോ അലർട്ട് പ്രഖ്യാപിച്ചു. കാസർകോട്, കണ്ണൂർ, കോഴിക്കോട്, വയനാട്,  ജില്ലകളിലാണ് ഇന്നും യെല്ലോ അലർട്ട് പ്രഖ്യാപിച്ചത്. ഈ ജില്ലകളിൽ നാളെയും യെല്ലോ അലർട്ടായിരിക്കും. ഒറ്റപ്പെട്ടയിടങ്ങളിൽ ശക്തമായ മഴയുണ്ടാകും. വടക്കൻ ജില്ലകളിലാകും ഇന്ന് ശക്തമായ മഴ തുടരാൻ സാധ്യത. മഴ തീവ്രമാകില്ലെങ്കിലും ഓരോ മഴയിലും ജാഗ്രത പുലർത്തണമെന്ന് അധികൃതർ അറിയിച്ചു.

കഴിഞ്ഞ ദിവസങ്ങളിൽ കനത്ത മഴ പെയ്ത പ്രദേശങ്ങളിൽ ഉള്ളവർ അതീവ ജാഗ്രത പുലർത്തണം. ഉരുൾപൊട്ടൽ, മലവെള്ളപ്പാച്ചിൽ, മണ്ണിടിച്ചിൽ സാധ്യതാ പ്രദേശങ്ങളിൽ ഉള്ളവർ മാറി താമസിക്കണം.  കേരളാ തീരം മുതൽ തെക്കൻ ഗുജറാത്ത് തീരം വരെ ന്യൂനമർദപാത്തി നിലനിൽക്കുന്നതാണ് കേരളത്തിൽ മഴ തുടരാൻ കാരണം.

അതേസമയം, കേരളാ തീരത്ത് നാളെ ശക്തമായ തിരമാലകൾക്ക്  സാധ്യത ഉള്ളതായി ദേശീയ സമുദ്രസ്ഥിതിപഠന ഗവേഷണ കേന്ദ്രം അറിയിച്ചു. കള്ളകടൽ പ്രതിഭാസത്തിനും സാധ്യതയുണ്ട്. രാത്രി 11.30 വരെ 2.0 മുതൽ 2.5 മീറ്റർ വരെ ഉയർന്ന തിരമാലയ്ക്കും കള്ളക്കടൽ പ്രതിഭാസത്തിനുമാണ് സാധ്യത. ഈ പ്രദേശങ്ങളിലെ മത്സ്യത്തൊഴിലാളികളും തീരദേശവാസികളും പ്രത്യേക ജാഗ്രത പാലിയ്ക്കുക