കൊല്‍ക്കത്ത: നേതാജി സുഭാഷ് ചന്ദ്രബോസ് അന്താരാഷ്ട്ര വിമാനത്താവളത്തിന്റെ റണ്‍വേയില്‍ വെള്ളക്കെട്ട്. കൊല്‍ക്കത്തയിലും സമീപ ജില്ലകളിലും പെയ്യുന്ന കനച്ച മഴയെത്തുടര്‍ന്നാണ് വിമാനത്താവളം മുങ്ങിയത്. 

വിമാനത്താവളങ്ങളിലിറങ്ങിയ വിമാനങ്ങളുടെ ടയറുകളിലധികവും വെള്ളത്തില്‍ മുങ്ങിയനിലയിലാണുള്ളത്. 

കൊല്‍ക്കത്തയിലും അതിന്റെ സമീപ പ്രദേശങ്ങളായ ഹൗറ, സാള്‍ട്ട് ലേക്ക്, ബാരക്പൂര്‍ എന്നിവിടങ്ങളിലെല്ലാം വെള്ളക്കെട്ട് രൂക്ഷമായി തുടരുകയാണ്. ബംഗാള്‍ ഉള്‍ക്കടലില്‍ രൂപപ്പെട്ട ന്യൂനമര്‍ദ്ദത്തെ തുടര്‍ന്നാണ് സംസ്ഥാനത്ത് മഴ തുടരുന്നത്. ഈ ന്യൂനമര്‍ദ്ദം നിലവില്‍ ബീഹാറിലേക്കും ഉത്തര്‍പ്രദേശിലേക്കും നീങ്ങിക്കൊണ്ടിരിക്കുകയാണ്,

ഹൗറ, പശ്ചിമ ബര്‍ധമാന്‍, ബിര്‍ഭം, പുര്‍ബ ബര്‍ധമാന്‍, ഹൂഗ്ലി, നാദിയ, വടക്കന്‍, തെക്ക് 24 പര്‍ഗാനാസ് എന്നിവയുള്‍പ്പെടെ തെക്കന്‍ ജില്ലകളില്‍ അടുത്ത 12 മണിക്കൂറിനുള്ളില്‍ മഴ തുടരാന്‍ സാധ്യതയുണ്ടെന്ന് കാലാവസ്ഥാ നിരീക്ഷണകേന്ദ്രം അറിയിച്ചു. 

വെള്ളിയാഴ്ച ഉച്ചയ്ക്ക് ശേഷം നഗരത്തിലെ ചില പ്രദേശങ്ങളില്‍ ഏഴ് സെന്റീമീറ്റര്‍ വരെ മഴ പെയ്തു. കനത്ത മഴ പെയ്തിട്ടും, വെള്ളിയാഴ്ച കൊല്‍ക്കത്തയില്‍ രേഖപ്പെടുത്തിയ കൂടിയ താപനില 30.1 ഡിഗ്രി സെല്‍ഷ്യസാണ്, ഇത് സാധാരണ താപനിലയേക്കാള്‍ 2.4 ഡിഗ്രി മാത്രമാണ് കുറവ്. ഏറ്റവും കുറഞ്ഞ താപനില രേഖപ്പെടുത്തിയത് 26 ഡിഗ്രി സെല്‍ഷ്യസാണ്, സാധാരണ നിലയേക്കാള്‍ 0.6 ഡിഗ്രി മാത്രം കുറവാണ് രേഖപ്പെടുത്തിയത്.