ന്യൂഡൽഹി: ആഭ്യന്തര റൂട്ടുകളിൽ ബിസിനസ് ക്ലാസ് അവതരിപ്പിച്ച് ഇന്ത്യയുടെ ബജറ്റ് എയർലൈനായ ഇൻഡിഗോ. തിങ്കളാഴ്ചയാണ് ബിസിനസ് ക്ലാസ് സീറ്റായ 'ഇൻഡിഗോ സ്ട്രെച്ച്' കമ്പനി പുറത്തിറക്കിയത്. ഇന്ത്യയിലെ ഏറ്റവും വലിയ എയർലൈനായ ഇൻഡിഗോയുടെ 'ഇൻഡിഗോ സ്ട്രെച്ചിൻ്റെ' ബുക്കിംഗ് ചൊവ്വാഴ്ച മുതൽ ആരംഭിച്ചു. തുടക്കത്തിൽ ഏതാനും നഗരങ്ങളിലേക്ക് മാത്രമുള്ള സർവീസിലാണ് ബിസിനസ് ക്ലാസ്. വൈകാതെ കൂടുതൽ നഗരങ്ങളിലേക്ക് ആരംഭിക്കും.

നിലവിൽ ഡൽഹി-മുംബൈ റൂട്ടിലാണ് ബുക്കിംഗ് ആരംഭിച്ചത്. 18,018 മുതലാണ് ടിക്കറ്റ് നിരക്ക് വരുന്നത്. നവംബറിൽ സർവിസ് തുടങ്ങും. 2025 അവസാനത്തോടെ ബിസിനസ് ക്ലാസ് സർവിസ് കുറഞ്ഞത് 12 റൂട്ടുകളിലെങ്കിലും ആരംഭിക്കും. മെട്രോ-ടു-മെട്രോ നഗരങ്ങളിലാകും ബിസിനസ് ക്ലാസ് നടപ്പിലാക്കുക. സെപ്റ്റംബറിൽ ആരംഭിക്കുന്ന "ബ്ലൂചിപ്പ്" ലോയൽറ്റി പ്രോഗ്രാമിൻ്റെ സമാരംഭവും ഇൻഡിഗോ പ്രഖ്യാപിച്ചു.

ബിസിനസ് ക്ലാസിൽ 2-2 കോൺഫിഗറേഷനിൽ 12 സീറ്റുകൾ ഉണ്ടായിരിക്കും. ഒബ്‌റോയ് കാറ്ററിംഗ് സർവീസസിൽ നിന്നുള്ള പ്രത്യേകം 'ക്യൂറേറ്റഡ് ഹെൽത്തി മീൽ' ഓപ്ഷനുകൾ ഇത് നൽകും. 38 ഇഞ്ച് സീറ്റ് പിച്ച് ഉള്ള, 2x2 കോൺഫിഗറേഷൻ ഫീച്ചർ ചെയ്യുന്ന ബിസിനസ് ക്ലാസ് ക്യാബിനിനായി ഇൻഡിഗോ റെക്കാറോയുടെ R5 സീറ്റുകൾ ആണ് ഉപയോഗിച്ചിരിക്കുന്നത്.

ഇൻഡിഗോ സ്ട്രെച്ച് സീറ്റുകളിൽ ആറ്-വിധത്തിൽ ക്രമീകരിക്കാവുന്ന ഹെഡ്‌റെസ്റ്റ്, 5-ഇഞ്ച് റിക്‌ലൈൻ, ഇലക്ട്രോണിക് ഉപകരണ ഹോൾഡർ, 60-വാട്ട് യുഎസ്ബി-സി പവർ സപ്ലൈ, മൂന്ന് പിൻ യൂണിവേഴ്‌സൽ പവർ ഔട്ട്‌ലെറ്റ് എന്നിവയുണ്ട്. ഇൻഡിഗോ സ്ട്രെച്ച് യാത്രക്കാർക്ക് കൺവീനിയൻസ് ഫീ, പ്രത്യേകമായി ക്യൂറേറ്റ് ചെയ്ത വെജിറ്റേറിയൻ മീൽ ബോക്സ്, വിശാലമായ പാനീയങ്ങൾ, അധിക ചെലവില്ലാതെ മുൻകൂർ സീറ്റ് തിരഞ്ഞെടുക്കൽ, മുൻഗണനയുള്ള ചെക്ക്-ഇൻ, എപ്പോൾ വേണമെങ്കിലും ബോർഡിംഗ് തുടങ്ങിയ കോംപ്ലിമെൻ്ററി ആനുകൂല്യങ്ങളും ലഭിക്കും

ആഭ്യന്തര വിപണിയിൽ 60 ശതമാനത്തിലധികം വിഹിതമുള്ള ഇൻഡിഗോ ഇപ്പോൾ ടാറ്റ ഗ്രൂപ്പിൻ്റെ എയർ ഇന്ത്യയുമായും അസോസിയേറ്റ് എയർലൈനുകളുമായും സമ്പന്നരായ യാത്രക്കാരെ ആകർഷിക്കാൻ മത്സരിക്കും.

ഇന്ത്യയുടെ കുതിച്ചുയരുന്ന സമ്പദ്‌വ്യവസ്ഥയും ഞങ്ങളുടെ ഉപഭോക്താക്കളുടെ വികസിച്ചുകൊണ്ടിരിക്കുന്ന അഭിലാഷങ്ങളും കണക്കിലെടുക്കുമ്പോൾ, ബിസിനസ് ക്ലാസ് പോലുള്ള അപ്‌ഡേഷനിലേക്ക് നീങ്ങുന്നത് വളരെ സ്വാഭാവികമായ മുന്നേറ്റമാണെന്ന് എയർലൈനിൻ്റെ 18-ാം വാർഷികത്തെ അനുസ്മരിച്ച് ഡൽഹിയിൽ നടന്ന ഒരു പരിപാടിയിൽ ഇൻഡിഗോ സിഇഒ പീറ്റർ എൽബേഴ്‌സ് പറഞ്ഞു. 

ഈ സാമ്പത്തിക വർഷത്തിൻ്റെ അവസാനത്തോടെ 40 ലധികം അന്താരാഷ്ട്ര ലക്ഷ്യസ്ഥാനങ്ങളിലേക്ക് എയർലൈൻ അതിൻ്റെ അന്താരാഷ്ട്ര സാന്നിധ്യം വിപുലീകരിക്കുമെന്നും പീറ്റർ എൽബർസ് പറഞ്ഞു. നിലവിൽ, ഇൻഡിഗോ പ്രതിദിനം 2,000-ലധികം ഫ്ലൈറ്റുകൾ നടത്തുകയും 33 വിദേശ നഗരങ്ങൾ ഉൾപ്പെടെ 120 ലക്ഷ്യസ്ഥാനങ്ങളിലേക്ക് പറക്കുകയും ചെയ്യുന്നു.