കണ്ണൂര്‍: ആയിക്കരയില്‍ നിന്നു മത്സ്യബന്ധനത്തിനു പോയ ഫൈബര്‍ വള്ളം മറിഞ്ഞു. കടലില്‍വീണ ആറു മത്സ്യതൊഴിലാളികളെ മറ്റൊരു വള്ളത്തിലെ തൊഴിലാളികള്‍ രക്ഷപ്പെടുത്തി. ഇന്നലെ പുലര്‍ച്ചെ ആയിക്കരയില്‍ നിന്നു മത്സ്യബന്ധനത്തിനു പുറപ്പെട്ട നവാസിന്റെ ഉടമസ്ഥതയിലുള്ള നിലാവ് എന്ന വള്ളമാണു രാവിലെ 7.30ഓടെ അഴീക്കല്‍ ചാല്‍ബീച്ചിനു സമീപം പുറംകടലില്‍ കീഴ്‌മേല്‍ മറിഞ്ഞത്.
കടല്‍ പ്രക്ഷുബ്ധമായ സമയത്തായിരുന്നു അപകടം. തയ്യിലിലെ ഹാഷിം, ദുഫൈല്‍, മലപ്പുറം താനൂര്‍ സ്വദേശികളായ കെ.പി ഫൈസല്‍, ടി.പി ഫൈസല്‍, സിറാജ്, കന്യാകുമാരി സ്വദേശി രാജന്‍ എന്നിവരെയാണു രക്ഷപ്പെടുത്തിയത്. ഈസമയം മത്സ്യബന്ധനത്തിനു സമീപത്തുണ്ടായിരുന്ന ആയിക്കരയില്‍ നിന്നു തന്നെയുള്ള സാര്‍ത്താന്‍കണ്ടി നിസാറിന്റെ വിശപ്പിന്റെ വിളി എന്ന വള്ളത്തിലെ തൊഴിലാളികളായ ഷംസീര്‍, റസാഖ്, നിസാര്‍, ആഷിഖ്, ഒഡീഷ സ്വദേശികളായ ഗണേശന്‍, കോട്ടു, ബഹദൂര്‍ എന്നിവര്‍ ചേര്‍ന്നാണു അപകടത്തില്‍പ്പെട്ടവരെ രക്ഷപ്പെടുത്തി ആയിക്കരയില്‍ എത്തിച്ചത്. മറൈന്‍ എന്‍ഫോഴ്‌സ്‌മെന്റിന്റെയും കോസ്റ്റല്‍ പൊലിസിന്റെയും പട്രോളിങ് സംഘങ്ങള്‍ അപകടസ്ഥലത്ത് എത്തിയിരുന്നു. വലയും എന്‍ജിനും ഉള്‍പ്പെടെ ലക്ഷക്കണത്തിനു രൂപയുടെ നഷ്ടം സംഭവിച്ചിട്ടുണ്ട്. കഴിഞ്ഞയാഴ്ച പുതിയങ്ങാടിയില്‍ ഒരു ഫൈബര്‍ വള്ളം അപകടത്തില്‍പ്പെട്ടിരുന്നു.